♥REVIEW : Dior snow BB Cream !♥
عاد مع النيو لوك للبلوق لازم نكملها مع ريفيو جميل ♥_♥
- حماية من الشمس 50 .. يعني يغنيك عن السن بلوك وحوسته !
- قوامه جداً جميل ، لاهو كريمي مره ولاهو ثقيل .. فيه ناس استخدمو البيبي كريم الكوري وقالو انه ثقيل ويدبّق كأنك حاطه سن بلوك ، بس هذا لا ماتحسين انك حاطه شيء على وجهك اصلاً ♥
- التغطيه تبعه رائعه ♥ ويعطيك لوك كأنه بشرتك بس احسن واحسن وتلق :$ .. مايبين انك حاطه شيء ! واشوف انه تغطيته احسن من التينتد موسترايزر بكثير ..
- ثباته جيد جداً ! قبل كنت اعاني بنص الدوام الاقي المنتج اللي حاطته رايح نصه وصاير شكله مو حلو .. بس مع ديور الحمدلله ارجع البيت وهو تمام ! صح انه يخف مو مثل اول ماتحطينه بس يخف شيء بسيط ومايفسد اللوك ..
- ميزه حلوه فيه .. بينما انتي حاطته لغرض تجميلي ، هو جالس يعالج بشرتك ويحسنها مع الوقت ، ولايكتم البشره ويسد المسام !
- يقولون انه 3 بواحد مرطب + واقي + يسوي تغطيه .. صراحه ماقدرت استغني عن المرطب بالنسبه لي مع مرطب اجمل
- يعطي نضااااره جميله للبشره ويفتحها درجه بدون مايخليها رماديه ! يخلي شكل بشرتك صحيييّه
- الباكيجنق تبعه حلو مره ! لما تضغطينه مايطلع لك كثييير ويحوسك ويضيعه عليك .. تقدرين تتحكمين بالكميه اللي تبينها
"للأمانه الصوره الثانيه اخذتها من النت عشان اوضح لكم"
Part 3 / eyebrows !!
السلام عليكم ورحمة الله وبركاته :$
اليوم البوست ان شاء الله بيكون عن الحواجب ♥_♥
كثير مايعرفون يصلحون حواجبهم في البيت ويعانون منها ، تشقير الحواجب مره سهل بس يبي له شوية تركيز وبتفهمين لحواجبك وتتصالحين معاها : )
ادرجت الحواجب مع سلسلة اساسيات الميك اب لأنها جداً مهمه .. طيب قبل ابدا في الدرس بقول اشياء :
اول شيء لاتحاولين تنحفين حواجبك مره عن عرضها الأصلي ! لأن كذا بيطلع نص حواجبك شعر اصفر وبيطلع منظرها مو مرتب :( ، وكل ماكانت الحواجب على رسمتها وبسيطه كل ماكان فيسك املح ومرييح عكس لما تكون حواجب حاده .. لما نجي نرسم الحواجب نمشي على رسمتها اسهل لين تكونين محترفه واذا بغيتي تغيرين بالرسمه شوي :$ يلا نبدا ♥
بالصوره اللي فوق الأشياء اللي راح نحتاجها :
1 – بلوندر (مشقّر) هذا اخذته من مي للعطور
2 – صبغة بني ويلّا العصار
3 – اوكسيجين عادي رقم 6 او 9
4 – اعواد اذان + اعواد اسنان
وطبعاً فنجالين اي فنجال قديم خصصيه لخلط الصبغه :$
طيب الحين نشوف صورة الحاجب اللي اشتغلت عليه قبل :
شكراً للموديل اللي تطوعت وخلتني العب فيها ♥_♥
اول شيء سويته جبت الصبغه البنيه العصار واخذت شوي منها وشوي اكسجين وخلطتهم بالفنجال ، بعدين بعود الأسنان اخذ من الصبغه وارسم الحاجب وامشي على رسمته الأساسيه ..
شفتو هنا حطيت الصبغه البني لحالها ورسمت الحاجب .. نخليه 10 دقايق بعدين نغسله ، اذا غسلتو حواجبكم لاتخافون ترا ماراح تطلع حلوه على طول ! :$
بعدين نبدا نجهز التشقير مثلاً نحط نص ملعقه بودرة التشقير ونص ملعقه اكسجين ونخلطه لين يطلع معنا كريمي ! مو ثقيل ولا خفيف ، طبعاً مو شرط هالمقدار بالضبط احيانا ازود وانقص لين اوصل لقوام كريمي
ونبدأ شغل !
بديت في بداية الحاجب .. نحاول مانخليه مربع مره ولا دائري مره .. نخليه مربع مدببّ : $ !
شفتو الجزء اللي حاطه عليه تشقير تحت ؟ هذا دائماً نحاول نحدده بس ماننحفه ونرقّي الحاجب فوق !! عشان يبان طبيعي اكثر ♥_♥
وهنا كملنا تشقير
نخلي التشقير يطوووّل يعني ساعه تقريباً عشان يصبغ صح .. ولو فيه تعديل على الرسمه نفسها نجيب عود الأسنان وناخذ من الصبغه البني ونعدل !!
ومرّت الساعه وغسلنا الحواجب
ممكن بعد هالخطوه نكون خلّصنا .. ونطلع بحواجب طبيعيه وحلوه ، واحياناً تحتاج تعديل ونحددها بالصبغه البنيه ، فهالمره حددتها لأن الموديل تبيها محدده زين :$
- نصيحه : لما اروح المغسلة اغسل التشقير اكون ماخذه معاي الصبغه البنيه وامسح المكان المتشقر فيها ، عشان تطفّي اللون الأصفر ويطلع قريب من لون الجلد ♥_♥
وبسسس !! وتمتعو بحواجب طبيعيه ومرسومه وجميله :$
يارب يكون الدرس مفهوم ومفيد لكم ♥
وتقبّل الله صيامنا وصيامكم : )
مع السلامه ، Love you all !!♥♥♥
أشوفكم في البوست الجاي إن شاء الله : $
Part 2 ♥ : كيف تختارين الفاونديشن المناسب لك ؟
السلام عليكم ورحمة الله وبركاته .. ♥
هذا البارت الثاني من سلسلة اساسيات الميك اب للمبتدئات
اليوم بتكلم عن الفاونديشن .. كيف تختارين الفاونديشن المناسب لك ؟ هو اصعب مرحله بالميك اب لو حطيتي كثير بتطلعين مهرّج ولو حطيتي شوي بتطلعين بـ ولا حاجه ، لو اخترتي النوع الغلط بينرمي بالدرج : (!
كثير يقولون انه لو بنحط دائماً فاونديشن او باودر او اي ميك اب بتندمر بشرتنا ، لا مو شرط ! اذا اول ماتخلص مناسبتك او دوامك تشيلين كل اللي حطيتيه .. ان شاء الله بشرتك ماعليها خوف ( أهم شيء تشيلين الميك اب بالمناديل مزيلة الميك اب او اي شيء بعدين تغسلين وجهك وترطبينه ) يعني لاتغسلين الميك اب مباشره بغسولك ..
طيب اول حاجه قبل تشترين الفاونديشن لازم تعرفين ايش نوع بشرتك ؟ جافه ، مختلطه ، دهنيه ؟
- البشره الجافه : اختاري فاونديشن يكون سايل أو ستيك أو (باودر بس تنحط على البشره باسفنجه رطبه ! )،
- البشره الدهنيه : اختاري فاونديشن يكون مكتوب عليه oil free خالي من الزيوت ! ، والباودر بتساعدك بأمتصاص الدهون وتعطيك لوك مات .. وصاحبات البشره الدهنيه بامكانهم استخدام فاونديشن قوامه موس مثل مايبلين
- البشره العاديه او المختلطه : فاونديشن سايل ، او باودر مافيه مشاكل مع هالنوع ماشاء الله .. بس لاتاخذو oil free والا شيء للبشره الجافه ، اطلبو فاونديشن للبشره العاديه
طيب بعد ماعرفنا كل بشره والمناسب لها ، الحين بنشوف كيف تختارين النوع حسب احتياجك ؟
هل بشرتك فيها مشاكل وحابه تخفينها ؟ الجأي للفاونديشن !
بشرتك مافيها مشاكل كثيره او صافيه ؟ او انتي بنوته وماتبين تستخدمين فاونديشن وحوسه ؟ عندك خيارين يا استخدمي مرطب ملون Tinted moistrizer !! اللي هو مرطب لكن معاه لمسة فاونديشن ويعطي تغطيه خفيفه ..
أو BB cream اللي استخدمه حالياً :$ هو اختصار لـ Belmsish balm وهي ماده تستخدم في علاج الحروق وكذا ، واخذو هالماده وحولوها لمنتج تجميلي ، مره خفيييف وجميل ويعطي لوك كأنه بشرتك بس احسن ! كثير انصح فيه احسن من الفاونديشن ، ما ادري ينفع اللي عندهم مشاكل في البشره او لا ، يناسب البنات اللي بالجامعه جداً لأنه غالباً يجي معاه حمايه من الشمس ويسوي تغطيه حلوه وخفيفه ..( قريب بسوي ريفيو عن البيبي كريم حقي )
الحين نجي لأختيار الدرجه المناسبه لبشرتك
ارجوك لاتحاولين تاخذين لون غير لون بشرتك الحقيقي ، الفاونديشن وظيفته يعطيك سنحه جميله ويخلي بشرتك احسن ، مو يغير لك لونك !
حددي ايش الاندر تون حق بشرتك ؟ هي على اصفر او على بينك او بني ؟ وعلى اساسها اختاري اللون
غالباً احنا الخليجيات الاندر تون حقنا على اصفر : $
طيب انتي رحتي للمحل واخترتي نوع الفاونديشن واللون المناسب .. استني لاتروحين الكاشير وتحاسبين وين رايحه !! الحين المحلات صارت نسائيه وش رايك تروحين لزاويه وتجربينه على وجهك وتحكمين ؟ :$
هذي اهم خطوه انك تجربينه قبل تشترينه لأنه يبي له دقه بالأختيار ..
بعد ما اشترينا الفاونديشن وناسبنا *Dance* الحين نتعلم كيف نوزعه ؟ طبعاً ما اقدر احدد كيف توزعونه ، لأن كل فاونديشن يختلف احياناً فيه شيء باليد يطلع احسن وشيء بالفرشاه احسن وشيء بالاسفنجه احسن .. فانتي جربي بيدك والفرشه وشوفي ايش الأحسن !!
بس بقولكم على الأغلب :
لو الفاونديشن حقك ستيك يعني زي كذا :
أو مضغوط زي كذا :
هالنوعين يفضّل توزعينهم بفرشاة دمج لأن قوامهم اثقل فيحتاجون توزيع كويس .. هذي صور لفرش الدمج
وهالفرش ينفعون للفاونديشن العادي بس مايكون مره مره سايل وخفيييف !!
لو سايل جداً وخفيف هذي انسب شيء أو بيدك بعد
بالنسبة للبيبي كريم والمرطب الملون مايحتاج فرشه احسن شيء باليد : $
وخلصنا بوست الفاونديشن !! YAY ان شاء الله اكون غطيت كل شيء يخصه واي سؤال تفضلو اسألوني .. واخيراً ترا كل ماكان الفاونديشن اقل كل ماكان اجمل ، وكل ماكثر كل ماغطى جمالك وملامحك : $
كل عام وانتو بخير ومبارك عليكم الشهر ♥♥♥
مع السلامه اشوفكم على خير : )
Lets talk : Ramadan !!
السلام عليكم ورحمة الله وبركاته :$
يا الله مره مبسوطه من اللي وصلت له في البلوق الحمدلله يارب !! مبسوطه فيكم كلكم اللي سويتو لي فولو واللي زرتوا مدونتي واللي عطيتوني كومينت .. شكراً لكم ولتشجيعكم ودعمكم ♥
اليوم تدوينتي مالها علاقه بالجمال زي ماتشوفون من الصوره والعنوان :$ حبيت اتكلم معاكم عن الشهر اللي ننتظره بفارغ الصبر ♥ شهر رمضان ♥ مين فينا ماينتظر هالشهر ويحببببه ويستمتع بكل دقيقه فيه ؟ له جو ونكهه خاصه جميله :( بس لو غيرنا عاداتنا فيه او اضفنا عادات جديده فيه ياترا كيف ييكون ؟ بيزيد جماله جمال ♥ رمضان اللي فات كان اجمل واحسن رمضان بحياتي تدرون ليه ؟ لأني ماجلست اشوف فيه مسلسلات وبس !! ما اقول اني تركتها ، الله يهدينا جميعاً كنت اتابع مسلسلات كثير بس اضفت عادات جديده ماكنت اسويها .. توي احس بطعمها ♥!! واحس بالراحه النفسيه برمضان ♥♥♥
ختم القرآن ♥ لحد يستصعبه والله انه سهل بس تكونين تسوينه وانتي بكامل رغبتك ومتلذذه فيه .. كيف نختم القرآن بشهر ؟ بعد كل صلاة نقرا 4 صفحات بس ! بس 4 والنتيجه نختم القرآن بشهر فضيل ،
قال رسول الله صلى الله عليه وسلم (من قرأ حرفاً من كتاب الله فله به حسنة ، والحسنة بعشر أمثالها لا أقول (الم) حرف ولكن : ألف حرف ولام حرف ، وميم حرف)
تخيلو كم حسنه بنحصل لما نختم القرآن :(؟ اجل كيف ختمه برمضان ؟ برمضان تضاعف الحسنات ♥
يقول الله سبحانه وتعالى: (من شغله القرآن وذكري عن مسألتي أعطيته أفضل ما أعطي السائلين وفضل كلام الله سبحانه وتعالى عن سائر الكلام كفضل الله تعالى على خلقه)
القرآن يرفع صاحبه !! ويكون شفيع له يوم القيامه بإذن الله ..
طيب اذا انتي ولا مره ختمتي القرآن ولاتقرين القرآن في الأيام العاديه وماتحافظين على صلاتك فوقتها ، لاتقولين ربي ماراح يتقبل مني !! خلي رمضان بداية جديده لك بعدها ماراح تتركين القرآن بتشتاقين له بتحسين انك محتاجه تسمعين قرآن محتاجه سكينه !! والصلاة لو حافظتي عليها برمضان بوقتها خلاص بتتعودين بإذن الله وتبتل معاك هالعاده .. اي عاده متضايقه منها وتحسين انك مقصره مع ربك فيها ، زينيها في رمضان وشدي حيلك وصدقيني بعدها بتكونين تركتي هالعاده .. برمضان اللي راح ماسمعت اغاني ابداً الحمدلله ، بعد ماخلص رمضان صرت ما ادور على الأغاني ولا اسمعها كثير ولا احرص علييها كله لأني تعودت برمضان على تركها ..
أنا بنت مثلكم مو مطوعه ولا ملتزمه (الله يهدينا) بس احاول ما الهى في الدنيا واترك اهم شيء فيها طاعة ربي والتعبد له ، عايشين حياتنا بالطول والعرض بس كلش والا نبعد عن ربي ونزعله مننا !! والأهم من هذا واحنا نسوي الطاعات ونختم القرآن نكون جالسين نحتسب الأجر عشان ربي يتقبل مننا ♥ .. شيء ثاني بقوله اللي هو القيام بالعشر الآواخر
اول مره بحياتي صليت فيها القيام كان رمضان اللي راح !! يا الله كان شيء جميل جمممميل ♥♥♥ تصلين في الليل لحالك بغرفتك وتدعين كل اللي بقلبك .. وانتي تصلين حاطه بقلبك أن ذنوبك بتنغفر كلها بإذن الله !!
قال صلى الله عليه وسلم: « مَنْ قامَ رَمَضانَ، إِيماناً واحْتِساباً، غُفِرَ له ما تَقدَّم مِنْ ذَنْبِه »
كل يوم بالعشر الآواخر تصلين القيام وتدعين اللي بخاطرك وتتعبدين ومحتسبه الأجر .. وتكون ليله من هالليالي ليلة القدر ♥♥♥( ليلة القدر خير من ألف شهر !!) يابختك لو قدرتي تصلين فيها وتتعبدين فيها وتدعييين فيها .. لو انتي عندك عذر وماتصلين ، لاتفوتين اي ليله من العشر الأواخر عشان هذاك الشيء :$ استغفري وادعي اللي بخاطرك وحطي فبالك انه ربي بيكتب لك على نيتك ان شاء الله ..
على طاري استغفري .. ايش رايكم لو نشد حيلنا ونستغفر بعد كل صلاة اللي نقدر عليه ميه مره او خمسين مره ؟
يمكن وانا اقولكم ميه وخمسين تحسونها كثيررره بس لا !! شوفو هالصوره
مفروض كل اصبع 3 نقط ونكون استغفرنا بكل يد 15 مره .. نكررها قد مانقدر ، الأستغفار شيء جميل تسهيل في الأمور وراحه نفسيه ورزق .. كثير نسمع قصص عن الإستغفار وكيف تحققت امنيات وتسهلت امور بسبب الأستغفار ♥
طيب يمكن وانتو تقرون هالتدوينه تحسون فيه اشياء كثيره ومستصعبينها صح ؟
طيب فكرو معاي .. بعد كل صلاة تقرين 4 صفحات من القرآن + تستغفرين بالطريقه السهله اللي حطيتها + بالعشر الأواخر تخصصين لك وقت آخر الليل وتصلين القيام .. وكذا تكونين ختمتي القرآن + استغفرتي وكل امورك بتمشي ان شاء الله + صليتي القيام وتعبدتي في ليلة القدر ودعيتي كل اللي خاطرك فيه و وكلتي امرك لله .. يا الله كيييف بيكون شعورك لما يخلص رمضان وانتي سويتي هذا كله ؟ بتحسين صدق بالعييييد وانك انجزتي برمضان وارضيتي نفسك وربك ♥
ان شاء الله ما اكون كثرت كلام عليكم :$ واي احد استفاد من كلامي وقرر يسوي هذا برمضان .. بليز لما يخلص رمضان تعالو بشروني وفرحوني انكم انجزتو ♥ بكون فخوره بنفسي وفيكم : ) .. كل سنه وانتو طيبين ♥♥♥ ورمضان كريم وينعاد عليكم بالصحه والعافيه والسعاده ..
مع السلامه اشوفكم على خير
Love you all !!
Part 1:♥ Makeup starter kit ♥
السلام عليكم ورحمة الله وبركاته ♥
اليوم ان شاء الله ببدأ سلسلة أساسيات الميك اب للمبتدئات !! وهذا اول بارت راح يكون عن المنتجات اللي بتحتاجينها وأساسيه .. بالبارتات الجايه بتكلم كيف استخدام المنتجات بالشكل الصحيح وبسوي ريفيوات عن اشياء مهمه : $
حاولت اقلّص عدد المنتجات قد ما اقدر .. طيب يلا نبدا
1 – اهم شيء طبعاً يكون عندك يا تينتد موسترايز "يعني مرطب ملون فيه لون وتغطيه خفيفه" أو فاونديشن أو بيبي كريم !! ومن هذولي كلهم افضّل البيبي كريم وما استغني عنه ابداً لأنه خفيف بس نتيجته تهبل وما استخدم اساس الا بالمناسبات فالبيبي كريم خلاني استغني عن التينتد موسترايزر والفاونديشن .. كل وحده تختار وش يناسبها من هالثلاث !! البيبي كريم ماراح اتكلم عنه واحرق الريفيو الجاي ان شاء الله بتكلم عنه بالتفصيل بالريفيو وبجيب لكم خدامتنا الجميله هههههههههههههه .. وهذي صورته
2- ماسكرا طبعاً محد يستغني عنها + عاكف رموش مره يسوي فرق لما استخدمه قبل الماسكرا !! يفتح العين وتبان الماسكرا صح ..
3 – بلاشر واكثر شيء احبه حطيته وكلهم بينك واحد من نيكس و واحد من ماك بالصوره يشبهون بعض بس بالحقيقه حق ماك ادفى .. أحب البلش الكريمي لأنه اسهل بالاصبع ويبين طبيعي مره ( الوان البلش الأساسيه : بينك .. لحمي .. مشمشي .. برونز )
4 – كونسيلر .. أحسن شيء بوبي براون طبعاً ، وللهالات السوداء قارنييه اللي فيه لون .. حلو مره وينفع يومي خفيييف يجنن ♥
5 - اي لاينر !! يمكن مو باين بالصوره اي لاينر مايبيلن الكريمي جميل وبديل قوي لماك نفس السواد والثبات بس الفرشه اللي معاه ماتنفع ابداً برأيي فأستخدم معاها فرشة مشطوفه من ماك او سيقما ..
النوع الثاني من الاي لاينر نفس الصوره .. جربت 3 من بورجوا وايلف وشيء من درعه وماك ماجربته لأن كثير يسبونه .. كلهم مايثبتون ويروح لونهم ياليت الاقي نفس كذا ويثبت واسووود :( لأنه سريع وسهل بالرسم ، لو لقيت ببشركم ان شاء الله واخر نوع اللي عند كل بنت الكحل القلم طبعاً : $
6 – آي شادو .. لونين يكفون ! لون فاتح على الجفن ولون بني كونتور + هذا اللون البني استخدمه للحواجب بعد بفرشة مشطوفه أحسن من القلم يبين طبيعي وحلووو :$ يعني 2 بواحد !!
7 – ارواج كل وحده وذوقها ولون بشرتها : $ بس حطيت الأساسيات " نود + بينك + فوشيا + كورال"
كلهم ماك بس لهم بدائل بريفلون وريميل .. اهم شيء اللون ! : ) بصراحه الأورنج ماحطيته ابداً بس فيه ناس يحبونه ، ولاتحسبونه مخلص بالصوره ترا منكسر هههههههههههههه : $
8 – قلوسات .. حطيت اكثر شيء استخدمهم من بينفت ومن ريميل شفاف وفيه تينت خفيييف
هذا بينفت ..
فيه شيء مره حلو وكان يغنيني عن كل ارواجي وقلوساتي : ( بس ضاع للأسسسسف
اللي هو من جيفنشي :
هذا كان ارواجي وبلشراتي وكلش : ( احطه على شفايفي وعلى خدودي بدال البلشر وش اقول وش اخلي عنه ؟ يعني للمبتدئين مره انصحهم ياخذونه 2 بواحد ولونه جميييل كأنه لون شفايفك بس على احلى وترطيب ويخلي شفايفك مليانه وتلمع لمعه حلوه مو قليتر وكذا ! اذكر شريته بميه وخمسين ويستاهل كل رياال ♥♥♥
واخر شيء اهم الفرش : فرشة فاونديشن + فرشة بلاش + فرشة مشطوفه للاي لاينر وللحواجب + فرشتين للآي شادو اللي هم
امممم اظن كذا خلصنا لأول بارت !! حبيت احط الأشياء المهمه والأساسيه بعدين نبدا شغل : $ ان شاء الله البوستات الجايه بتكون عن ( الفاونديشن اختيارك للون المناسب لبشرتك وتوزيعه الصحيح) + ( طريقة وضع الآي شادو الصحيحه والأساسيه + الآي لاينر) + ( كيف تزينين حواجبك في البيت ؟) + ( ريفيو عن بيبي كريم ديور) ..
أي طلبات تخص هذي السلسله قولو لي في الكومنت تحت أو في التويتر وابشرو : )
مع السلامه أشوفكم على خير ♥ Love you all !!
review : mac cream color base in " pearl" ♥♥!
السلام عليكم ورحمة الله وبركاته ..
اليوم مسويه لكم ريفيو عن منتج ما استغني عنه وأحبه جداً اللي هو كريم كولور بيس من ماك سعره في السبعينات او الثمانينات ما اتذكر : $ .. ايش هو الكريم كولور بيس ؟ هو منتج من ماك متعدد الإستعمالات وفيه الوان كثيره له وبحطها بالأخير ان شاء الله .. اول شيء هو كريمي و زي مانتو شايفين اللون هذا مره جميل وفيه لمعه حلوه مو قليتر مزعج ولونه مو فضي ولاذهبي بينهم
شوفو السواتش اللي ظالمه حبتين لأن لونه اجمل
♥ طيب اقولكم استخداماته الحين :
أكثر شيء احبه اني احطه عند مدمع العين ♥♥♥ يخلي اللوك جميل مره ويحلي العين حتى لو حاطه ماسكرا وكحل بس واحط هذا خلاص يكفي ♥ ولأنه كريمي ومافيه هذاك القليتر + لونه مو فضي على ابيض ولاذهبي اوفر ! يسوي جو مع العين :$ ويناسب كل الأوقات ..
استخدامه الثاني برايمر للعين ! هو لونه مره حلو لو احطه لحاله بس مشكلته يسيح ماينفع ابد لحاله فاستخدمه برايمر قبل الشادو ويأدي الواجب يثبت الشادو ويوضح لونه !!
برضو استخدمه على عضمة الخد كلمعه جميله نفس اللي دائماً ينسأل عنها ( وش يحطون بخدودهم بنات هوليود ؟ :P ) ويستخدم بعد فوق روج مات وتبين فيه لمعه بس ماجربت هالشيء ..
وبعد يستخدم تحت الحاجب للي يحبون هالشيء بس ماجربته برضو ..
طيب الحين بوريكم الوان الكريم كولور بيس عند ماك
Luna
ابيض وفيه شيمر فروست
pearl
هذا الزين اللي نحكي عنه : $
Hush
ترابي مع لمعة ثلجيه فروست
Shell
بينك على بيج مع لمعة فروست
Improper Copper
نحاسي مع لمعة فروست !
Take Root
بني أحمراني ومافيه لمعة " ليمتيد اديشن"
وأخيراً بحط لكم مقطع وحده جميله مستخدمه الكريم كولور بيس نفس اللون اللي تكلمت عنه !! شوفو كيف استخدمته و وين حطته : )
وبكذا اكون خلصت هالبوست ان شاء الله يكون مفيد : $ انتظروني بسلسلة حماسيه ان شاء الله .. اشوفكم على خير
مع السلامه ♥ Love you all
review : Bobbi brown FOUNDITION and concealer
السلام عليكم ورحمة الله وبركاته
اليوم بتكلم عن كريم أساس بوبي براون + الكونسيلر + البيس ..
نبدا بكريم الأساس ، هو اول كريم اساس عجبني لأنه خفيييف قوامه كأنه لوشن !! .. فيجي على البشره طبيعي مو ثقيييل ويكتم ، كريمات الأساس عند بوبي براون فيها التغطيه الكامله والمتوسطه والخفيفه وفيه للبشرة الدهنيه والجافه والمختلطه .. بفرعهم بالفيصليه في هارفي نيكلز فيه غرفة تدخلين وتحط لك الخبيرة كريم الأساس وتشوفينه بنفسك كيف عليك مناسب او لا وتاخذين على حسب بشرتك ، بشرتي مختلطه عطتني هذا النوع +اخذت تغطيه متوسطه عشان المناسبات .. والاندر تون حقه على اصفر + فيه حماية من الشمس 15
هنا سويت له سواتش عشان تشوفون كيف قوامه ولونه على اصفر ..
الخبيره قالت لي انه كل مابغيتي تغطيه اكثر حطي طبقه فوقه وماراح يبين مكتل ولا شيء ، وفعلاً ! بزواج حطيت طبقتين وطلع ولا اجمل منه + بما انه خفيف زي ماقلت فأخلطه مع البيس واسويه تينتد موسترايزر ويجي خفيف وحلوووو ومشرق .. يعني هالكريم استثمار له 3 استخدامات بدال ما تشترون واحد للمناسبات و واحد يومي و تينتد موسترايزر .. عندكم هذا بس لازم لازم تقولون للخبيره نوع بشرتكم وتعطيكم على حسب نوعها + جربوه عندها يمكن مايناسبكم .. شيء اخير بقوله لاتاخذون درجة افتح من لونكم، شايفين كيف بالصوره حقي غامق ؟ ترا لما احطه يطلع نفس لووني وش زينه
يلا نجي لصور الفاونديشن على الفيس :$ متحمسين صح ؟
اشكر خدامتنا اللي اقتنعت اجربه عليها ياحبيييلها ♥
قبل وضع كريم الأساس :
زي ماتشوفون عندها كلف وبقع ..
هنا حطيت لها البيس بس .. ترا هالشيء البينك عشان هي مسلمه ومحجبه فغطيت شعرها ورقبتها :)
هناااا حطينا كريم الأساس ♥♥♥ نشوف بدت تتغطى البقع
وهنا حطينا الكونسيلر !! وتغطى كل شيء ♥_♥
وش رايكم : $ ؟
نجي للبيس .. ماكنت ناويه اخذ البيس بس لما حطته علي عجبني خصوصاً لما قالت انه يثبت الميك اب ومايحتاج باودر معاه ، وانا اكره الباودر !
استخدامه يا بيس تحت الأساس او كريم نهار عادي لأنه فيه حماية من الشمس ويرطب كويس ..
هذا هو الجميل ..
وأخيراً وليس آخراً الكونسيلر ..
اكيييد كثير سمعتو عن كونسيلر بوبي براون هو النمبر 1 بالكونسيلر ، يخفي الهالات السوداء بشكل مره كويس + البقع والآثار .. الخدامه ماشاء الله ماعندها هالات شديدة بس فيها شوي واختفت مع الكونسيلر !! والبقع غطاها زين الاندر تون حقه بيج على اصفر وهذا افضل شيء للهالات ، يجي معاه كوريكتر على اورنج شوي للهالات الشديدة ينحط قبل الكونسيلر وتحصلين على تغطية كااامله ومافيه اي هالات ان شاء الله ..
طريقة وضع الكونسيلر : اهم شيء ترطيب العين بمرطب عميق خاص فيها ، نستنى دقيقه تمتصه البشره وبعدين نحط بالفرشاه الكوريكتر اذا الهالات شديدة أو نستغني عنه ونحط الكونسيلر على طول بالطبطبة بالفرشاة وبعدين تطبطبين بأصبعك على خفيف فوقه وخلاص ♥:)
الفرش اللي استخدمتها للأساس (سيقما F60 ) والكونسيلر ( سيقماF60 )
مكان الشراء : هارفي نيكلز الفيصليه
الأسعار :
كريم الأساس 210
البيس : 230
الكونسيلر : ما اتذكر للأسف بس الظن انه 150 مو اكثر من كذا
وبكذا اكون خلصت هالبوست .. ان شاء الله يعجبكم ويفيدكم وشكراً لكم ♥ Love you all