تاق : عشرة منتجات ميك اب ما استغني عنها ..

السلام عليكم ورحمة الله وبركاته
^ أمانه وش رايكم بخلفية الأغراض الرماديه ؟اتفنن تراني :(
واخيراً بسوي التاق  : 10 منتجات ميك اب ما استغني عنها .. اغلب المنتجات بتكون معروفه لمتابعاتي لأني حكيت عنها كثير وجد احبها وما استغني عنها .. فماراح احكي بالتفصيل عنهم لأني تعمقت فيهم من قبل :$ يعني هذي المنتجات اللي اقول اشتروها على ضمانتي هههههههههههههههه :$
شكراً للجميله ترتر اللي بدأت التاق واختارتني اسويه :*
بسم الله نبدأ :$
1 – كحل مايبلين ، ثابت واسود ومايسيح وسعره لؤطه
(موجود في سنتر بوينت والسعر خمسين او ستين)
2 – بيبي كريم ديور ، come on حفظتوه مني اتوقع :$ سويت عنه ريفيو من قبل .. مره احبه وما استغني عنه وتشوفون كيف مخلص قضيت عليه :$ وعلى اني شريت بيبي كريم جديد بس مفكره ارجع لهذا أحسه غير ومناسبني مره .. على فكره ممكن مايناسب ذوات البشره السمراء الجميله اللي بشراتهم سمراء بيناسبهم بيبي كريم سماش بوكس لأن فيه درجات كثيره
(موجود في سيفورا و وجوه والسعر 250)
3 – بلش كريمي من ماك اسمه posey  جميل جمييييل هالبلش ! لونه بينك صدقي وشوي مره منه يكفي الخدين كلهم وقوامه اجمل واجمل .. واشوف انه يستاهل سعره ولايتقارن بنيكس او غيره ، فرق بالثبات والقوام و وضوح اللون ، مره ثابت هالبلش يجلس ساعات مايروح وشكله على البشره يهبل يخليها مورده كيوت :(
سواتش :



4 – أي شادوهين من ماك بس مخليتهم بمثابة منتج واحد ، لأني استخدمهم لحواجبي ومره احبهم .. واحد لونه بني غامق مره والثاني بني فاتح شوكولا ولما اخلطهم يطلع لي لون حواجبي المضبوط
الغامق اسمه Embark ، والفاتح اسمه Swiss chocolate
5 – كوريكتر بوبي براون ، برضو من المنتجات اللي حكيت عنها كثيييير .. افضل كوريكتر وكونسيلر جربتهم من بوبي براون بس فيه حاجه بأنبه عليها ، تفرق لما احط الكوريكتر بأصبعي ولما احطه بفرشاة الكونسيلر ! مره فررررق .. يوم العيد حطيت من الكوريكتر بالفرشاة "على غير العاده" واول ماشافتني خالتي قالت وش حاطه تحت عيونك مافيه هالات :O مع انها تستخدم نفسه .. فهذا شيء انتبهو له ياجميلات
(محل بوبي براون  في هارفي نيكلز الفيصليه والسعر ميه وعشرين)
6 – آي شادو من ماك Naked launch لون ناعم وهاااادي من أحلى الألوان بماك ، مو مات ولا قليتر جاي بينهم فيه لمعه بسيطه وهاديه ولونه فيه لمسة بسيطه بينك خربزي .. أحب احطه على كل جفني لحاله وعلى مدمع العين ، شيء كيوت

سواتش :



7 – ماسكرا لانكوم hypnos اتوقع كثير منكم يعرفها او سمع عنها وتستاهل الشهره هالجميله .. تطول الرموش وتكثفها بنفس الوقت ، ولما تعكفين رموشك قبل وتحطينها تحسينك حاطه فيك لاش .. مخليتها للمناسبات
(بميه وشيء o_o) مجرمين ..
8 – ماك كريم كولور بيس اللون Pearl ، سويت ريفيو عنه من قبل وهو منتج من ماك متعدد الإستخدامات ، استخدمه ك برايمر قبل الاي شادو يثبته ويوضح لونه واستخدمه برضو على مدمع العين يعطي لمعه جميله مره ولو حبيت بسهره احطه على عظمة الخد ..
(من محلات ماك وسعره بالثمانين)
9 – ريفلون ليب بترز ، انا انسانه اعشق أي منتج للشفايف فيه ترطيب ولون ، احسه شيء كيوت وبسيط واحبهم اكثر من الأرواج واستخدمهم كثيرررر ، هالفتره طايحه بالريفلون ليب بترز خصوصاً هاللونين وحطيتهم بمفضلات الشهر اللي فات ..

(موجودين في سنتر بوينت واسعارهم بالأربعين او الخمسين)
اللون اللي على اليمين اسمه suger plum واليسار pink truffle
10 – فرشاة ريل تكنيك ، هذي اكثر فرشاة احس اني استخدمها ، احسن شيء فيها انك تقدرين تستخدمينها اكثر من استخدام تنفع للفاونديشن وللبلشر وللبرونز  بس انا اكثر شيء استخدمها استخدام ثاني اللي هو كلمسة اخيره  ، يعني : لما اخلص ميك اب واكون حطيت برونز وبلشر اخذ هالفرشاة وادمجهم عشان يطلع الشكل طبيعي ومو عباره عن بقعة بلشر وبقعة برونز :$
(طلبتها من امازون)

وبس كذا اكون خلصت البوست ، ان شاء الله يكون ممتع ومفيد
بحبكو :*
اشوفكم على خير ان شاء الله ..
I tag :
Catwalkglam
N Voyage
Le haya
Amira mou
Miss design
Norah beautybox
Float

ماهو الستروب كريم من ماك ؟ وماهي استخداماته ؟

السلام عليكم ورحمة الله وبركاته

كل عام وانتو بخير ياجميلات ❤  حبيت اسوي بوست قبل العيد وفيه بنت الهمتني اسوي هالبوست اللي كنت مجهزته من زمان بس ناسيته والله يعافيها ذكرتني :$
البوست  بيكون عن منتج من ماك جميل وله استخدامات متعدده ومو الكل يعرفونها .. اللي هو ستروب كريم

خلوني اول شيء اقولكم ايش هو ستروب كريم ؟
هو عباره عن كريم مرطب وفيه فايتمينات ومكونات مفيده مثل الشاي الأخضر .. هذا الكريم مو مصنف انه كريم عنايه بحت ، يعني مو مثل كريمات الليل اللي نحطها وكذا ، لا هذا كريم نستخدمه استخدام تجميلي لكن بنفس الوقت فيه مكونات مفيده  
الشيء المميز فيه انه فيه لمعه بس مو لمعة قليتر مزعجه ، لا لمعه ناعمه اللي الكل يدورها ويسمونها لمعة هوليود او الديوي وهذا سواتش له عشان تشوفون كيف لمعته .. هالمنتج مثالي لما تجيك ايام بشرتك مرهقه وتعبانه وذابله ، تحطينه كمرطب بعدين تحطين الفاونديشن او الباودر او حتى تخلطينه مع الفاونديشن وبيخليك مصحصحه وبشرتك تكون افضل ..

سواتش "من قوقل"



الشكل التقريبي لما تستخدمين ستروب كريم :

ايش استخداماته ؟
كثير يشترونه ويحتارون فيه مايدرون ايش يسوون فيه وكيف يستخدمونه .. بس مع الإستخدام تكتشفين كيف وخلوني اقولكم على استخداماته :
-          تخلطينه مع الفاونديشن ويعطيك لوك ديوي وصحي جميييل طبعاً هو حلو مثلاً لو بالصباح تبين تحطين شيء خفيف بس ماتبين فاونديشن ، ممكن تاخذين شويه من فاونديشنك وتخلطينه مع هذا الكريم وبيجي خفيييف وفيه لمعه صحيه وحلوه وتناسب الصباح أما لو بالليل وبالعزايم تقدرين تخلطينه بس احرصي يكون الفاونديشن تغطيته عاليه عشان مايخففه لك .. برضو لو عندك فاونديشن مات وتبين لوك ديوي اخلطيه معه ويعطيك لوك ديوي ..

-          بما انه فيه لمعه تقدرين تستخدمينه على جسمك في المناسبات ، على كتفك وصدرك والسيقان ويعطي لمعه بالضبط زي هوليود ، وياسلام لو عندك شيمر تان سائل وتخلطينه مع هالكريم بيعطي افيكت رائع على الجسم

-          استخدامه الطبيعي واللي بيجي على بالك على طول ، قبل الفاونديشن رطبي بشرتك فيه بعدين حطي الفاونديشن بتلاقين بشرتك منوره وفيها لمعه حلوه خصوصاً تحت فاونديشن مات اللي احياناً يخلي البشره باهته

-          استخدام آخر جميل واحبه هو انك لما تخلصين ميك اب ، تاخذين من هالكريم وتحطينه بمناطق بوجهك تبين فيها لمعه وتكون بارزه مثل عظمة الخدود والجبهه وتحت الحواجب " تحطينه على شكل نقط صغيييره بعدين تطبطبين ولاتفركينه عشان مايمتصه الفاونديشن "
-          ممكن تستخدمينه مع بيقمنت عندك "تاخذين شوية مره بيقمنت وتخلطينه مع الكريم هذا " ويصير معاك بلش كريمي جميل
-          أو تحطينه فوق البلش وتجي خدودك فيها لمعه بس اهم شيء كثري بلشر قبل تحطينه لأنك لما تحطينه بيخلف لون البلشر .. نفس هالصوره


اممم هذا اللي في بالي الحين وان شاء الله ما اكون نسيت شيء ، على فكره هالكريم فيه منه حجم صغير للسفر فحلو انكم تاخذون هالحجم وتجربونه قبل تشترون الكبير
سعره تسعين يمكن أو ميه .. الحجم الأصغر مدري بكم بس سعره معقول اتذكر
مكان الشراء من ماك
الشيء اللي حابه اقوله بما انه البوست عن منتج يعطي ديوي لوك ..
الديوي لوك يعتمد على بشره نظيفه وصافيه ، يعني قبل تسوين هاللوك احرصي تنظفين بشرتك بالبخار وتشيلين الرؤوس السوداء وتشيلين فتله عشان يجي معاك حلو وبيرفكت ، ما اقول لازم البشره تكون طبيعتها صافيه ، اهم شيء نظيفه وتقدرين تغطين الحبوب او الاثار بالكونسيلر والفاونديشن بعدين تستخدمين الستروب كريم هذا
وآخر شيء تذكرو انه كل بشره تختلف عن الثانيه وكل وحده وذوقها واستخدامها للميك اب ❤ فيه ناس تحب الشيمر الباودر وناس تحب شيء ديوي وكريمي وهالناس راح يعجبهم هالمنتج ان شاء الله ..

خلصنا هالبوست ، اشوفكم على خير ان شاء الله
مع السلامه :)

كيف ترتدين الشفاة الغامقه ؟

السلام عليكم ورحمة الله وبركاته
< وش رايكم بالعنوان بالفصحى :$ يهبل صح ❤.❤
طيب اليوم البوست مره مفيد .. خصوصاً بهالوقت اللي بدينا نحط ارواج غامقه ونحبها
بعد بوست توجهات الموضه لاحظت كثير منكم اعجبتكم الموضه والشفاة الغامقه وخصوصاً اللون الكرزي :$
فحبيت اشارككم هالطريقه ، كيف تستخدمين الأرواج وتحطينها بالطريقه الصحيحه
سابقاً ماكنت اقرب من الأرواج الغامقه ! لما احطها احس ملامحي تختفي خلاص وماتطلع هالأرواج حلوه علي ابداً ، يعني على قولة الأجانب washes me out .. بعدين مع التمرس والملاحظات عرفت ليه انا مايطلع معاي حلو ! واتوقع كثير منكم مايعرف هالمعلومه او هالخدعه ،
كيف تخلين الشفاة الغامقه جذابه ؟
= بلش برونز او مائل للبرونز .. سواء كان غامق او فاتح وبالكاد ينشافهالحركه تخلي ملامحك ادفى وتتماشى مع الروج الأحمر او أي روج غامق ويطلع فتنه فتنه ! بتحبين شكلك وبتعشقين الروج الأحمر الغامق ،
وغلط غلط غلط تحطين روج غامق والبلشر بينك ودرجاته
حتى لو كنتي مو مسويه تان عادي تحطين بلش مائل للبرونز ودافي أو حتى تسوين كونتور
يعني الزبده تستخدمين لون دافي بوجهك سواء كان بلش او كونتور :$ .. خلينا نشوف صور فنانات مسوين هالتكنيك :








الشيء الثاني اللي حابه اذكره في هالبوست .. هو برضو تكنيك تسوينه لما تستخدمين روج غامق
اغلبنا يعاني من الروج الغامق لما يروح منّا ومنّا -.- والشفايف ماتكون متحدده زي الفنانات وش زودهم ؟ خلوني اقولكم كيف شفايفهم تطلع متحدده وجميله بالأرواج هذي
-          اولاً تاخذين كونسيلر وتحددين فيه حوالين شفايفك وهذي صوره للتوضيح ( طبعاً هي مستخدمه قلم بس انا اقولكم استخدمو كونسيلر وهالصوره مجرد توضيح للمكان اللي بتحطين فيه كونسيلر وكيف تحددين شفايفك فيه من برا )



< اللي محدده عليه دائره :$
-          بعد كذا هاتي محدد لحمي وحددي شفايفك نفسها فيه وعبيها
-          الحين انتي جاهزه وحطي روجك واستمتعي فيه :$

وبس كذا نكون خلصنا هالتدوينه اللطيفه :$ وحابه اشكركم على ردة فعلكم الجميله ودعمكم لآخر بوست الله يسعدكم يارب ❤ ..
مع السلامه ، اشوفكم على خير ❤

تنسيقات العيد ❤!

السلام عليكم ورحمة الله وبركاته
زي ما اتفقنا بالتويتر هالبوست بيكون تنسيقات سويتها عشان تاخذون منها افكار للبس العيد :$ طبعاً حرصت يكون كل تنسيق فيه شيء تريندي .. حاولت ابعد عن الشتوي لأن الجو لسه ماصار بارد وما اتوقع احد راح يلبس شتوي في العيد .. لو اعجبكم هالبوست واعجبتكم اختياراتي ممكن اسوي نسخه ثاني للشتاء إن شاء الله ..
بالصور نفسها كتبت عند كل قطعه الماركه تبعها .. حاولت اتقيد بالماركات اللي اسعارها حلوه وموجوده هنا عشان الكل يقدر عليها وما اخسَركم :$
يلا نبدأ



كله زارا ..




أفكر اروح اشتري لي نفس هالتنسيق :$ أحب هالألوان مره .. ولو كان التوب افخم شوي وساده كان يطلع حلو مع عقد فضي كبير :( بس للأسف مالقيت نفس درجة هالتوب على افخم .. فصار اللوك كاجوال على شيييك وعلى فكره البنطلون خامته مره جميله وظالمته الصوره ..



هالشيء اللي من توب شوب ابيه :( ينلبس فوق الفستان ويبين كأنه من الفستان مو قطعه ثانيه ..






































وبس ❤

بنات بقولكم شيء :$ .. يمكن وانتو جالسين تقرون التدوينه تحسونها سريعه وبسيطه
بس لا ، هالتدوينه اخذت مني وقت وجهد عشان الاقي القطع واركبها على بعض وتطلع بشكل جميل وبنفس الوقت يكونون كلهم على الموضه الحين .. عشان كذا لو تحسون انكم استفدتو من مدونتي بشكل عام اتمنى منكم تدعمون المدونه اكثر من خلال الريتويت وما الى ذلك .. ماتتخيلون كيف هالشيء يفرحني اني اشوف نتيجه لتعبي ❤
أحبكم وتستاهلون هالتعب والله ❤ مع السلامه اشوفكم في التدوينه الجايه اللي مدري عن ايش بتكون :$

توجهات الموضه لخريف وشتاء 2012 - 2013 "ميك اب"

السلام عليكم ورحمة الله وبركاته
وحشتوني :( .. اليوم البوست بيكون عن توجهات الموضه بالميك اب للخريف والشتاء + ريفيو
كل التريند اشياء جميله ومتحمسه لها خصوصا الأرووواج <3
طيب خلينا نبدأ عشان ما اطول عليكم :$

1 – الميك اب اللحمي Nude makeup
كيووووت وجميل بالشتاء مع الملابس الشتويه الغامقه ياسلام










2 الآي لاينر مستمر بس هالمره عريض




3 – حواجب عريضه






4 خدود موّرده



5 – الظلال المعدنيه











أما بالنسبه للأرواج ❤❤❤ طبعاً بتكون غامقه لأنه شتاء ، هالمره اللون التريندي مو عنابي بس ، للأسف مدري كيف اوصف اللون لأن ماله اسم بالعربي :/ نشوف الصور احسن وراح تفهمونه :$ هو بين العنابي والأحمر والموف -.- قبل نشوف هاللون والأرواج خلوني اوريكم التريند الجميييله اللي متحمسه اسويها:(
اللي هي الشفايف المتدرجه ombre lips
يا اما تحطين لون افتح بالوسط أو العكس وكل الحالتين جميييييل وغريب ❤❤❤❤



كيووووووووت :(





جميل مره







وهذا فيديو يعلمكم كيف تسوونها " طبعاً الألوان تقدرين تسوين على مزاجك وتبدعين "

http://www.youtube.com/watch?v=4AWUlXwnYug
الروج اللي حكيت لكم عنه هو نفس لون (النبيذ):$ + برضو لسى باقيه الغوامق موضه اللي هي العنابي والأحمر الغامق والبنفسجي ..



وهذا ريفيو عن 3 ارواج تتبع هذي الموضه :$






سيفورا - ديور - ريفلون ليب بتر

أول شيء روج ديور اديكت ، هو تقريباً لون النبيذ !
الروج نفسه جميل مرررره ودي اروح اقش كل الألوان ، تقريباً هو نسخه احسن من الريفلون ليب بتر
يعطي لون واضح بس بنفس الوقت يرطب الشفايف ..
لونه بالعلبه غامق مررره بس على الشفايف يجي افتح وتقدرين تتحكمين باللون تحطين اكثر من طبقه لين يطلع غامق
وهذا سواتش :



فوق حطيت طبقتين منه ، تحت مسحه وحده ..
وهذا شيء حلو انك تقدرين تتحكمين بدرجة اللون ، يعني بالصباح تحطين مسحه وحده ومايطلع اوفر :$ لونه مره جميييييل :(
تقريباً كذا لونه على الشفايف


فيه اجمل ؟

روج سيفورا هو لونه موف غااامق وجريء .. شكله على الشفايف نفس كذا :




أما الريفلون ليب بتر ، يحاكي هالموضه بس بشكل ابسط وصباحي ، لونه اهدا من ديور وافتح بكثير بس يضل من درجات النبيذ والموف :$
وهذا سواتش للثلاث ارواج



من فوق : سيفورا رقمه R24
ديور اديكت 987 black tie
ريفلون ليب بتر suger plum

للأمانه رحت ودورت في سنتر بوينت وفي وايتس ارواج نفس هالألوان لأني مخططه على هالتدوينه بس كانت الأرواج مخلصه مافيه الا كم لون :/
اللون اللي كنت ادوره من ريفلون اسمه black cherry يارب تلقونه ولونه نفس ديور بس على اغمق :$

الأسعار   :
ديور : مو متأكده من السعر بس ميه وشيء
سيفورا : 90 ريال
ريفلون : 40 أو 50  ريال

وكذا نكون خلصنا ❤ ان شاء الله اعجبتكم التدوينه :$
وراح يكون فيه الفاشن تريند بحطه في التويتر على هاش تاق #شتاء2013
واشوفكم على خير ان شاء الله واوعدكم خلاص برجع للتدوين واتفرغ :$
شكراً لكم ❤ مع السلامه :)

© BeautyDeRosee. Design by MangoBlogs.