Review : benefit fine one one




السلام عليكم ورحمة الله وبركاته

الريفيو اليوم راح يكون عن منتج جديد اطلقته بينفيت مؤخراً اللي هو Fine one one ،

بينفيت من الماركات المفضله عندي لسببين : ابتكارهم وافكارهم الجديده ، ولإهتمامهم بالتفاصيل الصغيره من ناحية الباكجنق .. وطبعاً اكيد جودة المنتجات حلوه
كان عندي فضول اجرب هالمنتج وتحمست له خصوصاً انه نزل عندنا بسرعه بالسعوديه ، بالعاده المنتجات تطول ماتوصلنا :/
إيش فكرة المنتج Fine one one ؟
هو عبارة عن ستيك فيه 3 الوان :


1 – لون لؤلؤي على بينك (هاي لايتر – اضائه)
2 – بالنص لون بطيخي
3 وبالأخير لون مشمشي كورال

المنتج يستخدم للخد وللشفايف ، لما تستخدمينه للخد راح يسوي لك ثلاث اشياء : كونتور – بلشر – اضائه وبخطوه وحده بس 


الطريقه سهله جداً :

تفتحين الغطاء وتمسحين المنتج على الخد ابتدائاً من تفاحة الخد لحد العظمه بعدين تدمجينه بأصابعك
هالثلاث الوان مفروض تشتغل سوا وتعطي وجهك قلو ..  وهذا فيديو عاملينه بينفيت يوضح لك كيف تستخدمينه (وايضاً بالكرتون لما تشترينه راح يجي معاه ورقه توضح لك طريقة الإستخدام) :

http://www.youtube.com/watch?v=neHmSHwe2Cw


شايفين الفرق قبل وبعد ؟ جد احسه اعطى المودل قلو و وجهها صار فيه حياه
المنتج بشكل عامل اعجبني وناسبني الحمدلله

صور :






رأيي وملاحظاتي :

-          الألوان سوا مره جمييييله مشمشي على بينك (بطيخي)

-          من ناحية الكونتور "اللون المشمشي" ما حسيته سوا لي كونتور بمعنى كونتور يعني نحت ! "ممكن البشرات الفاتحه مره يُعتبر كونتور لها" انا حسيته اعطى وجهي دفء ولمسه حلوه وهالشيء كفايه

-          اللون الثالث البطيخي هو اللي حلو على الشفايف بس مو ثابت ومايغني عن الروج

-          مره حلو المنتج للمبتدئات بيوفر عليهم شراء اكثر من منتج

-          ممتاز تحملينه بشنطة الميك اب عشان وقت الزنقه لو بغيتي تتضبطين بخطوه وحده وبمنتج واحد بتضيفين قلو وحياة لوجهك ولاراح تحتاجين فُرشة

-          برضو حلو للسفر ماياخذ مكان ولاياخذ وقت وانتي تحطينه

-          البيقمنت وسط مو مره عالي ولا خفيف

-          خليك حذره بإستخدامه وانتي تمسحين على الخد ! لاتضغطين بقوه عشان مايتكتل ويطلع لون كثير واوفر .. امسحي بشكل خفيف بعدين طبطبي على الخد وادمجيه ولو احتجتي زيدي شوي

-          علبة المنتج عمليه وتناسب للشنطه وحجمه حلو يدخل بشنطة الميك اب بكل سهوله

-           ثباته نص ونص .

-         ماراح يناسب البشرات الغامقه لأنه بالكاد راح يبين عليها


Fine one one حلو كثير للمبتدئات وللي يحبون الميك اب الناعم .
البنات اللي يحبون الميك اب ومليانين منه ، راح يكون ممتاز لشنطة الميك اب عشان تسوي تتش اب و للـ لوكات الناعمه ،
لأنه مايعطي نتيجة كونتور وهاي لايت نفس لما نستخدم منتجات كونتور وهاي لايت بإنفراد وبالفُرش

تقييمي للمنتج 7.5 / 10 لأنه ثباته مو جيد ولأنه مافيه منه درجات متعدده عشان تناسب كل البشرات .
غير كذا المنتج توب ، واعتقد ان سهولته بالإستخدام تغفر لثباته لأنك تقدرين تعيدين عليه بسرعه وسهوله : )

وكذا اكون خلصت الريفيو اتمنى اكون غطيت المنتج من كل النواحي واستفدتو واشوفكم في تدوينات جايه إن شاء الله .

سعر المنتج 150 أو 180 مو متأكده كم بالضبط
المنتج مفروض يكون توفر الآن بكاونترات بينفيت بالسعوديه "سيفورا - وجوه - دبنهامز"

مع السلامه :*
Love u all

Yumminess | الآيس كريم اللذيذ



السلام عليكم ورحمة الله وبركاته
اليوم البوست تغيير عن اللي متعودينه بمدونتي ، قررت اضيف قسم "yumminess" بالمدونه وبيكون عباره عن اكلات مره سهله مثل مشروبات ، سناكز ، اكلات سريعه بشكل عام .

طيب اليوم راح استفتح هالقسم الجديد بشيء فريش ومنعش , بمناسبة فصل الربيع والإجازة والوناسه
اللي هي طريقة آيسكريم لزيز واقدر اسميه الآيسكريم الحُلم ، لأن كل وحده تقدر تغير بالمقادير وتحط الأشياء اللي تحبها وتبدع والطعم ولا اجمل *.*
وغير طعمه اللزيز ، فكرة تقديمه حلوه وجديده / أنا سويت نكهتين منه ونشوف المقادير :


1 آيسكريم بأي نكهة تحبين (اضطريت على آيسكريم السعوديه بس حلو مش بطال) لو تحطون آيسكريم بالتوفي بيطلع اجمل
2 زبدة الفول السوداني
3 أوريو
4 هيرشي كيسز
5 سيروب كارميل
6 اعواد مدري ايش تتسمى :$
7 كوب ورقي
وزي ماقلت تقدرين تغيرين فيها وتحطين التشوكلت اللي تحبين ولو كنتي تبين شيء خفيف استبدلي التشوكلت بفراوله مثلجه مثلاً .
الطريقه ، مره سهله وهي :
-          اولاً نحط السيروب بقاع الكاس بعدين نكسر فوقه الهيرشي كيسز "ممكن تستبدلونه بـ البندق او اي مكسرات تحبون" :


-          ثانياً نحط طبقة آيسكريم حوالي 3 ملاعق
-          فوق الآيسكريم ، نحط زبدة الفول السوداني ونكسر فوقها اوريو كسر كبيره
-          نحط طبقة اخيره للآيس كريم ، ونغمس العود فيه

بعد كذا نجيب التغليفه الشفافه البلاستيك ونغطي الآيسكريم فيها وندخله الفريزر لمدة ماتقل عن 4 ساعات


النكهة الثانيه / مقاديرها :


1 آيسكريم
2 نوتيلا
3 فيريرو روشيه
4 سيروب كارميل
5 كاس ورقي
6 اعواد

الطريقه نفس اللي فوق :

-          أولاً نحط السيروب بقاع الكاس الورقي
-          ثانياً نحط طبقة آيس كريم حوالي ملعقتين وفوقها شوية نوتيلا
-          نحط طبقه ثانيه من الآيسكريم وفوقها النوتيلا والفيريرو روشيه زي كذا :



-          واخيراً نحط طبقة آيسكريم نهائيه ونغمس العود فيها :



بعد مانطلعه من الفريزر ايش نسوي ؟
نجيب مقص ونقص طرف الكاس من فوق ، بعدين نبدا نسحبه بيدنا ونشيل الكاس الورقي عشان يبقى لنا الآيس كريم "نفس الصوره" :
 

وهذي النكهة الثانيه بالنوتيلا والفيريرو روشيه *.*


وبس ! يتقدم بصحن زي كذا ، طبعاً الآيسكريم ماع شويه لأني طولت وانا اصور :$


وبالعافيه عليكم مقدماً :$ ، ان شاء الله يكون اعجبكم البوست وفكرة القسم الجديد بالمدونه
اشوفكم في التدوينه الجايه ان شاء الله
Love you all ، مع السلامه

روتين العنايه بشعري | Hair care routine




السلام عليكم ورحمة الله وبركاته
اخيراً صلحت البلوق ورجعت للتدوين ! الحمدلله يارب .
كيفكم ياجميلات ؟ اتمنى تكونون بأحسن حال
اليوم راح احكي لكم عن روتين العنايه بشعري وبعض الستيبس المهمه ،

قبل ابدأ في روتيني ، بقولكم نصائح مره مهمه وممكن تكون بنظركم بسيطه بس لما تطبقينها بتشوفين فرق كبير بشعرك ! :

-        لو لاحظتي تساقط وتعب بشعرك اول شيء تسوينه تعملين تحاليل وتشوفين لو عندك فقر دم او أي مشاكل تأثر على شعرك ، لأن الشعر يتغذى على الدم ..

-        قبل تهتمين في الشامبو والتريتمنتز ، اهتمي بأكلك لأن الغذاء الكويس هو اللي فعلاً راح يجيب نتيجه وينعكس على شعرك وصحته

-        لاتهملين نقطة تمشيط الشعر ، اولاً تمشيط الشعر راح يحرك الدوره الدمويه براسك وهالشيء مهم لصحة شعرك وقوته ، ثانياً لما يكون شعرك متشابك يتعرض للتساقط اكثر عكس لما يكون ناعم وخالي من التشابك

-        بين فتره وفتره حاولي تاكلين فايتمنز راح تفيد شعرك كثير واظافرك

-        لاتغسلين شعرك يومياً ، وبنفس الوقت لاتطولين بين الغسلات وتخلينه يدهن ! لما يدهن شعرك بتكون جذوره ضعيفه فبالتالي يكون عُرضة للتساقط

-        دائماً مشطي شعرك وهو 50 % مبلول بمشط اسنانه وسيعه وتكون الأسنان نهايتها مدببه .. لما تمشطين ابدأي من تحت لين فوق ، وانتبهي من المشط العادي على الشعر المبلول جريمه

-        اهتمي بترطيب شعرك من خلال البلسم والماسكات ، الترطيب مهم كثير عشان تحصلين على شعر متغذي وشكله جميل

هذي اهم الستيبس واللي بعضها كنت غافله عنها لكن لما تقيدت فيها شفت فرق بشعري الحمدلله .. احياناً يكون سبب المشكله بشعرنا شيء بسيط واحنا مانحس فيه !

روتيني :




·         * مرتين في الأسبوع استخدم شامبو منقي ومطهر لفروة الراس وبعدها استخدم ماسك معالج و ترطيبه عميق
·         * باقي الأيام استخدم شامبو عادي وبلسم
·         * مرة وحده بالأسبوع اسوي تريتمنت وغالباً يكون زيت جوز الهند


الشامبو المنقي والمطهر هو شامبو BIG من Lush ، والماسك هو ماسك الماكديميا
زي ماقلت هالشيئين استخدمهم مرتين بس بالأسبوع وبالنسبه لي هم مزيج بيرفكت ..



الشامبو BIG



حبيته كثير كثير ، هو عبارة عن شامبو بأملاح البحر ينقّي ويطهر فروة الراس ويشيل كل الترسبات العالقة فيها ، ولأنه شامبو منقّي راح ينشف شعرك شوي عشان كذا استخدمه مع ماسك الماكديميا
الشامبو مناسب لكل انواع الشعر وراح تلاحظين لمعة وفوليوم "حجم-كثافه" بشعرك
زي مانتو شايفين الشامبو فيه زي الحبيبات اللي هي الأملاح ، ريحته جمييييله ومنعشه وسبب هالريحه هو مزيج النيرولى والفانيليا والآيريس ..

احياناً لما يكون ماعندي طلعه او دوام ، استخدم هالشامبو لوحده بدون ماسك او بلسم عشان اريح شعري واخليه يتنفس ..

الماسك macadamia deep repair mask

يستاهل كل المدح والشهرة اللي جاته ! من جد ماسك جميل ترطيبه عميق عمييييق يترك الشعر ناعم وفيه لمعه ويخفف النفشه كثير ، مكوناته هي زيت الماكديميا والأرقان وهو مخصص للشعر التلفان والمتضرر بيرجع له نعومته وحيويته وبتشوفين هالشيء من اول استخدام ، هذا غير ريحته الفتنه والفريش واللي تبقى بالشعر وقت طوييييل يعني من بكرا لو فكيت شعري او حركته تنتشر الريحه كأني توي متحممه .. ريحته بالضبط نفس ريحة شامبو هيربل المنعشه !
لما استخدمت هالماسك حسيت شعري كان عطشان قبل ، والأهم انه مكوناته مفيده وطبيعيه تستخدمينه وانتي متطمنه عكس ماسكات قارنييه ولوريال وغيرها

ممكن تحسون سعره غالي بس يستاهل كل ريال وراح يجلس لك وقت طويل لأن شويه منه تكفي الشعر كله ..

طريقتي فيهم :

اغسل شعري بشامبو BIG بعدين اقسم شعري نصفين وابدا اوزع الماسك واحط الشاور كاب واكمل روتين الجسم والوجه على مايخلص الماسك ، اتركه تقريباً 10 دقايق بعدين اغسله .. ولما اغسله ما اخلي الماسك يروح 100 % من شعري ، يعني اخلي يبقى 10 % كذا :) بهالطريقه يكون شعري ليّن ومترطب كويس والريحه تمسك اكثر

باقي ايام الأسبوع - الشامبو :

اغيّر بين هالأثنين
mane tale
avalon organics
 و مين تيل بالنسبه لي احسن لكن خذو الأخضر اللي مكتوب عليه herbal grow افضل بكثير من اللي بالصوره ..

شامبو مين تيل الأخضر كويس للتساقط ولاحظت انه يطول الشعر فعلاً ويعطي الشعر حجم مايخليه مسطح وطايح ، اللي بالصوره جربته ومو حلو بس حطيته عشان اوضح الفكره لأن الأخضر مو عندي حالياً .
شامبو avalon ماحبيته لكن راح اعطيه فرصه ، سمعت عنه انه كويس للتساقط وانه يعطي حجم للشعر بس لما جربته حسيته ماينظف ابداً وهذا شيء طبيعي لأي منتج اورقانيك بس احس هذا بزياده : / بس فعلاً حسيت اعطاني كثافه غير عن العاده .

 البلسم :


بلسم coolaulin من Lush

هو عبارة عن بلسم بجوز الهند والليمون للشعر الجاف والكيرلي ، مكتوب في موقعهمم انه يعمل على حماية الشعر من التقصف والتلف نتيجة استعمال مجفف الشعر او المكواة الكهرباىيه " الستريتنر"

ترطيبه مو عميق بس حلو كـ بلسم يومي

البلسم الثاني هو aussie three minute miracle

هذا استخدامي له قليل وعند الحاجه لأنه مره ينعم الشعر ولو حسيت شعري بدا يتقصف استخدمه كم مره ويتحسّن التقصف ! هو فعلاً ميركل بس ما احب اكثر من استخدامه لأنه مو من المنتجات الطبيعيه :(


التريتمنتس "المعالجات" :

اكثر شيء استخدمه هو زيت جوز الهند واللي عندي هو النارجيل – حطيته في علبة تونر كلينيك لأن علبته مو عمليه ابداً ..
احس كل بنت لازم عندها زيت جوز الهند لشعرها ، مره كويس للشعر يغذيه ويساعد بتحسن الشعر لو كان متضرر ويحل مشكلة التساقط مع الإستمرار عليه .. ومن اول المرات بتحسين بنعومة ولمعه بالشعر
بس الشيء السيء فيه ريحته مو حلوه ! سمعت عن اللي من وادي النحل انه ريحته حلوه فـ بجربه واشوف ان شاء الله

الشيء الثاني هو Root Stimulator Hair Fertilizer

هو عبارة عن تريتمنت لفروة الرأس واسمه بالعربي سماد الشعر lol ، قريت عنه ريفيوز يقولون انه معجزه يترك الشعر صحي ويطوله ويغذيه ،
بصراحه انا مالاحظت شيء حلو فيه غير انه يطول الشعر ، فـ لو كنتي قاصة شعرك ومتوهقه وتبينه يطول بسرعه استخدميه بتستفيدين منه .. غير كذا ماقدر احكم عليه تماماً

واخيراً حمام زيت بانويل
من الأشياء اللي ما استغني عنها ، حتى لما جبت ماسك الماكاديميا ماقدرت اتركه وصرت استخدمه مره وحده كل اسبوعين او مره بالشهر عشان احافظ على نتيجته وعشاني احبه :$ اول ما استخدمته من سنه تقريباً كان شعري تعبان مره واستمريت عليه هو وزيت جوز الهند اكثر من 3 شهور وتغير شعري للأحسن الحمدلله ، فيه منه نوعين انا اللي استخدمه بالقمح للشعر الجاف وفيه ثاني بالمشمش للشعر الدهني او العادي .. ميزة حمام الزيت هذا انه يصلح الشعر المتضرر ويعطيه ترطيب وليونه  

المنتجات اللي استخدمها بعد الشاور :




كريم تصفيف من ماكاديميا و سيروم لوريال الفيف

الكريم حلو كثير وريحته نفس الماسك منعشه وجميله ، يعطي الشعر ليونه ويخفف النفشه ، طريقتي فيه اني اخلي شعري بالمنشفه عشر دقايق بعدين امشط شعري بمشط اسنانه وسيعه واحط شويه من الكريم على شعري من اذني لين الأطراف واركز عليها ..

السيروم احطه بس لما استخدم استشوار او فير او ستريتنر .. غير كذا اكتفي بالكريم


المنتجات المذكوره :

-          -  شامبو BIG من Lush  سعره 117 فيه حجم اصغر بـ 70 ، فروع lush بالرياض هي المملكه والفيصليه

-          -  ماسك الماكاديميا macadamia deep repair mask سعره الكبير الموجود بالصور فوق بـ 200 وفيه
-          احجام صغير و وسط  متوفر بمحلات نزيه ، وصيدلية نزيه بحياة مول

-          - شامبو mane tale سعره 35 متوفر بصيدلية وايتس + التميمي + الدانوب وبعض الصيدليات الكبيره توفر
ه
-          - شامبو avalon من امازون :

-          - بلسم coolaulin من Lush سعره الكبير بـ 127 والصغير بـ 70 تقريباً

-          -  بلسم aussi من صيدلية بوتس لكن مو فرع السعوديه وتلقونه في امازون :

-          - زيت جوز الهند النارجيل سعره 10 ريال متوفر عند العطارين

-          - Root Stimulator Hair Fertilizer من امازون

-          - حمام زيت بانويل العلبه الكبيره بـ 45 موجود في كل الصيدليات

-          - كريم التصفيف من ماكاديميا حجمه ميني وسعره 35 تقريباً

-          - سيروم لوريال بـ 35 بالصيدليات والهايبر ماركت


وكذا اكون خلصت البوست ، اتمنى استفدتو منه وما اكون طولت عليكم :$ ولو عندكم أي سؤال تفضلو فيه بالأسك http://ask.fm/BeautyDeRosee

اشوفكم في التدوينة الجايه ان شاء الله ، مع السلامه
Love u all




© BeautyDeRosee. Design by MangoBlogs.