Two favourite products that should be hyped! منتجين ما استغني عنهم ويستحقون ينشهرون

Monday, April 20, 2015

 
 
 
Hi everyone,
 
i'm finally posting in English and Arabic also! today I'm going to talk about two favorite products that no one knows about ! there are always some products that are worth the hype you know just like NARS concealer , mac lipliners , loreal foundation ....etc
 
but these two I haven't seen any one talk about and they are really good !
 
مرحبا بنات ، ان شاء الله كلكم بخير :*
 
اليوم حبيت اسوي تدوينة خفيفه ومفيده ، مع كثرة المهتمين بالميك اب بالأنستقرام نلاحظ فيه منتجات كثيره مشهورة وتخلص بسرعه والكل حابها ، مثلاً كونسيلر نارز ، فاونديشن لوريال ومنتجات انستازيا .. الخ
 
فـ بدل ماكررهم قلت بشارككم منتجين جميلين وما انذكرو كثير ، اشوف انهم يستحقون يكونون مشهورين!
 
The first one is Chantecaille waterproof brow definer in OAK BROWN
 
I guess it's the same idea of the TOMFORD one, the things I love about this one are
  • it's not too pigmented that it will be hard to control , it's the right pigmentation that I like
  • This OAK BROWN color is sooo beautiful! it's dark brown but a littly ashy so it will blend with your natural brows even if they are black , just brush them and it will blend beautifully .
  • The pen shape is a lifesaver!
  • it's so natural like your own brows are thick it doesn't look like you messed with them lol
 
This product is only for people who love natural looking eyebrows!



 
أول منتج صرت ما استغني عنه ، احبه كثييير ومبسوطة اني اكتشفته بالصدفة هو قلم الحواجب من  Chantecaille
كنا طالبين من ساكس أغراض وبستغل الشحن واشتري قلم حواجب توم فورد لأن كنت حابه اجربه ، لكن صارو مايوصلونه ولقيت هذا بالصدفه واخترته مع انه ماعندي أي فكرة عنه! والحمدلله جمعتنا الصدفه ههههههههههه
فكرته انه القلم نفسه مشطوف نفس شكل الفرشة اللي نرسم فيها الحواجب ، طبعاً الأشياء اللي احبها فيه :
 
  • انه مو مره غني باللون لدرجة يحوسك وماتقدرين تتحكمين ويجي الحاجب غامق وتو متش ، كمية اللون مناسبه جداً
  • الدرجة اللي عندي هي OAK BROWN جمييييلة ، بني غامق لكن رمادي فـ يندمج مع شعر حاجبك حتى لو هو اسود! بس مشطي الشعرات وكل شيء بيندمج سوا ويكون لونهم حلو . حتى لما افتّح شعري مناسبتني هالدرجة
  • شكل القلم يفك ازمه يخليك تخلصين حواجبك بثواني
  • وأخيرا انه منظره مره طبيعي .
 
Note : هذا المنتج للي يحبون الحواجب النظيفه الطبيعيه ! اللي تحب الحواجب حاده وبارزه ماراح يناسبها

 
ممكن شرائه من هنا
Now we're talking lips :*
This Nars velvet lip liner in EL AGUA is just beautiful
a matt dusty lilac color with a tiny hint of pink , the formula is also good not drying at all .
actually this shade is very popular but not in middle east .
 
 
الحين نجي للأشياء الحلووه ، قلم شفايف من Nars بالدرجة EL AGUA
الدرجة كمية جمال ماقدر اوصفها ، موف ليلكي وردي باهت (الوصف ههههههه)
مطفي بس انه ماينشف الشفايف ابداً ، مره حلو اللون من الأرواج اللي تحلّي ❤
القلم مشهور برا اعتقد لأنه يخلص بسرعه من موقعهم حسب ماقرأت لكن هنا ماشفت احد حكى عنه عشان كذا ادرجته .
هنا سواتش :
 
 

Swatch is via

 
 
 
وهنا شكله على الشفايف مع قلوس فوقه :
 
 
الصور من النت .
 
 
وهذا كل شيء لـ تدوينة اليوم ان شاء الله اعجبتكم ، والحين قولو لي ايش المنتج اللي ماتستغنون عنه ومو كثير مشهور؟
 
 

 

 

وين تلاقوني؟Keep in touch

Instagram,Twitter,Snapchat,Storehouse :

BeautyDeRosee

اليوزر موحَد
 
 
(لايوجد راعي لهذه التدوينة)
 


Here comes the bride 2 تدوينة العروسات - جزء الفستان

Wednesday, March 18, 2015





مرحبا :**

اول شيء شكراً كثير على ردة الفعل الجميله وتشجيعكم ، انبسطت ان التدوينة اعجبتكم وان شاء الله هالبارت يعجبكم .

راح ادخل بالزبده على طول لأن المعلومات كثيره ويارب اعرف ارتبها ،

بسم الله .


هذا البارت راح يكون عن الفستان والأشياء الجميله المتعلقه فيه

 

اختيار طلّتك ❤

 
 

اكثر جزء راح يحيرك لكن خذي وقتك على الآخر لاتستعجلين في هالمرحلة ابداً .
بتوضح لك الصورة بالنهايه وتختارين وانتي مبسوطه

خطوات مهمة اثناء اختيار الفستان :

* جربي جميع الستايلات ولاتركزي على اللي فبالك لأن ممكن تكتشفين انه فيه ستايل ثاني مناسبك اكثر فـ خليك متفتحه اثناء البحث .
* لاتختاري فستان بس لأنه موضه ، حاولي تكون طلتك كلاسيكيه والموضه تدخل بتفاصيل صغيره .
* في كل زيارة للبوتيك خذي صورة لنفسك بالفستان اللي اعجبك عشان ترجعين لهم بعدين وتقررين
* فستانك وشكلك يعبر عن شخصيتك وذوقك فـ لاتكونين نسخه من كل العروسات ، تمسكي بذوقك وسوي اللي حابته
* لاتسمعين اراء كثير لأنها راح تلخبطك ، بيجي احد يقولك فكي شعرك واحد يقول لميه واحد يقول البسي كذا وكذا ، كل هذا راح يشتتك وتترددين حتى لو انتي عارفه ايش تبين .



* watching the runways

 تفرجي قد ماتقدرين على عروض الأزياء للعرايس لآخر موسم واستلهمي منها ، في هذه العروض لاتركزين فقط على الفستان ، ركزي على الطرحة - اكسسوارات الشعر - شعر المودل وميك ابها - المسكه
اليوتيوب مليان عروض أزياء جديده وتقدرين تبحثين بهالكلمات  مع كتابة السنه عشان تطلع لك العروض الجديدةbridal fashion week  -bridal show
أو تبحثين عن مصمم معين وهنا لستة افضل مصممين فساتين عرايس واكيد فيه مصمم منهم راح يمثل ذوقك وتختارين الستايل اللي حابته ولو ميزانيتك تسمح تشترين منهم .

 - Oscar de larenta bridal
 - Carolina Herrera bridal
- pronovias
- berta bridal
- Monique  Lhuillier bridal
- Reem Acra
- Marchesa
- Romana keveza
- Lazaro
- Steven Khalil
- vera wang

* inspiration board

سوي لك نفس لوحة الإلهام ، بـ استخدام التطبيقات اللي تجمع اكثر من صوره : جمعي صورة فستان اعجبك مع الطرحه والمسكه والشعر وتخيلي اللوك مع بعضه كيف بيكون ، هالشيء بيصفي ذهنك كثير وبتتقلص الخيارات شوي شوي وتختارين طلتك بقناعه ورضى .. سويت كثييير طلات وهميه لين طلعت باللي راضيه فيها .

يمكن للحين مافهمتو كلامي بس بوضح لكم ، هنا آخر بورد صفى سويته وطبقته بكل اللي فيه ❤ أصلا هالبوردز بتبقى ذكريات عندك

(فستاني صممته بنفسي فـ راح تشوفوني حاطه اقمشه بالبورد وهي اللي استخدمتها بفستاني)

 
 
جمعت اقمشتي والطرحه سوا عشان اشوف اذا كل شيء على بعضه متناسق أو لا
 
+
 
 
هذي صورة لمسكتي اول ما استلمناها ❤ احب الأوركيد جداً ،  طبعاُ توي عدلتها وحطيتها بدال المسكه الافتراضية الأولى :$
 
تحت راح أتكلم المسكه والكيكه من وين ، الحين نكمل بـ الطله :
 
 
 
* online dress shopping?
 
جتني استفسارات كثيره عن لو انصح احد يشتري فستانه من النت ، طبعاً كل بنت حره ولها خياراتها
بس نصيحتي لو قررتي تطلبينه ، مري قبل على بوتيكات وقيسي كل الفساتين بكل القصات وشوفي ايش القصه اللي بيرفكت عليك واطلبي مثلها .
 
 
 
في حال العروسه مصرّه انها تطلب فـ هذي مواقع حلوه كثير ( وفيها شوزات وطرحات وكل شيء يخص هالموضوع + تلاقون فيها اكمام دانتيل واشياء جميله تضيف للفستان )
 
 
 
العروسه الناعمه  + عندهم طرحات واكسسوارات شعر جمييييله جميييله ، كنت دائماً افتح الموقع واشوف جديدهم ، من اجمل المواقع ❤
 
 
 
وهنا موقعين عندهم فساتين لمصممين كبار مثل فيرا وانق و اوسكار دي لا رينتا ، لكن انتبهو فيه أشياء جديده وفيه أشياء ملبوسه
 
 
 
 
 
للميزانية المحدودة :
 

 
 
دليل لشكل الجسم والقصه المناسبه له :
 
 

 
 
 
وهنا أسماء ستايلات الفساتين بالإنقلش :
 
 
 
* The wedding lingerie
 
لاتنسين البرا المناسبه لفستانك ، فيكتوريا سيكرت عندهم أشياء تفك ازمه حتى لو الظهر مفتوح ، المشدات والحاجات هذي موجوده في موقع Asos و Nordstrom اللي يكونون خفيفات مو نفس الكورسيه .
 
 
 
لـ مين رحت ؟
 
 
 
الكيكة :
 
من PetitCake بالرياض ، كان خيار ناجح شغلهم راقي ودقيق ومره متعاونين ويسوون الكيكه نفس ما اطلبها بالضبط ، طبعاً بالزواج قلت لهم مايضيفون ورد لأن انا راح اضيفه بس شائت الأقدار انه اهلي نسو يحطون ورد فيها عشان كذا انتبهو تكثرون مهام على الأهل بيوم الزواج لأنهم راح ينحاسون وينضغون فـ ينسون شغلات ، اعتمدي على المحلات واختاري الثقه منهم .
 
المسكة :
 
زهرة الربيع فرع طريق الملك فهد ، امام مستشفى دله
ما ادري عن باقي الفروع بس هالفرع بالذات جداً متعاونين وسريعين ، زي ماشفتو المسكه مره متقنه وسووها احلى من اللي طلبت والله . اعتمدت على شركة الديكور بس ماوفرو الورد اللي ابي وعلى طول كلمت زهرة الربيع وارسلت صورة المسكه ومن بكرا استلمناها الحمدلله!
 
المصورة :
 
مصورة اسمها غادة في منطقة سدير لكنها توقفت للأبد .
 
الشعر والميك اب بمنطقة سدير برضو .
 
 
 
انتهى ❤❤❤
 
ان شاء الله التدوينات كانت مفيده وممتعه لكم ، حبيت اقدم معلومات مفيده بعيداً عن أي شيء شخصي ، هذا آخر بارت بس أي وحده عندها استفسار لاتتردد في التويتر والانستقرام @beautyderosee
وفي الأسك برضو .
 
مع السلامه ...
 


Here comes the bride ❤ لكل عروسة

Wednesday, March 4, 2015






السلام عليكم ورحمة الله وبركاته .
أول شيء وحشتوني و وحشتني الكتابة بالمدونة ❤
مثل ماتعرفون لو متابعيني بالأنستقرام والتويتر انه تم زواجي الحمدلله ، والتحضيرات للزواج فعلاً مهمة وتاخذ وقتك وتفكيرك اكثر من ماتوقعت وهذا اللي ابعدني عن المدونة والسوشيال ميديا . لكن مو معناته انها مو ممتعه بالعكس الحمدلله !

قررت أشارك البنات تجربتي بالأشياء اللي راح تفيدهم لأنه ابداً مافيه مصادر حلوه بالعربي الا ما ندر . وأتمنى جد انه يستفيد احد لو بمعلومه وحتى السنقلز الحلوات راح يستفيدون .

راح تكون مجموعة تدوينات مختصره ومرتبه ، عن التحضير والعناية + الفستان واختيار اللوك

طبعاً كل شيء بالتدوينات من تجربتي الخاصة مافيه أي دعايه او رعاية من أحد

بسم الله نبدأ :

 

التحضيرات والعناية بنفسك :


- أول شيء تعمله العروسه انها تخصص دفتر كذا جميل لتحضيراتها وترتيب امورها ، ممكن تدلعين نفسك وتطلبينه عليه اسمك من هنا ❤

اضغطي هنا

الأفضل تختارين واحد صغير عشان يكون بشنطتك دائماً .


- بعد كذا انصح من كل قلبي انه كل عروسة تدخل pinterest وتسجل فيه وتسوي لها Board تجمع فيه الأفكار سواء فساتين ديكور شعر كله بتلاقينه مهما كان ذوقك وبتستفيدين كثييير منه .
انا مسويه لي بورد هناك اذا حابين تشوفونه وتاخذون أفكار هذا حسابي BeautyDeRosee تحطونه في البحث ويطلع لكم .
هنا https://www.pinterest.com/

طريقة الموقع سهله بس لو مره ماعرفتو فيه شروحات بالنت لأن مابي اتطرق له واضيع الموضوع :* طبعاً فيه منه تطبيق للجوال


كذا انتي صار عندك مرجع والهام ، وعندك مكان ترتبين فيه افكارك اللي هو الدفتر ❤

من هنا تنطلقين وتبدأين تجهزين فعلاً .


مواقع راح تفيدك وتعطيك الهام وأفكار :

The knot

Style me pretty

Love my dress

green wedding shoes

grey likes weddings

omg im getting married


ايش استنتجت واستفدت من تجربتي ؟

Do your own plan قسمي أولوياتك بنفسك


فيه حكاية ما اتفق معها اللي هي تدخلين الأقلاع وتشوفين تقسيم المهر ؟ بنات كل وحده تختلف بذوقها واحتياجها عن الثانية غلط مره تمشين على تقسيم ناس غيرك لأن بينتهي فيك الحال بمليون شيء ماتحتاجينه .
انتي انسانة فاهمه وعارفه نفسك اكثر من غيرك قسمي فلوسك لحالك وحسب اولوياتك وذوقك ممكن ترجعين للجداول هذي بس عشان تتذكرين الأشياء .

Don't go crazy with the pieces لاتكثرين من القطع بشكل مجنون


وفيه حركة مره غلط أتمنى نفكر فيها بعقل ومنطق ،
مسألة اننا نحسس نفسنا راح نروح لمكان نائي  وبنشتري كلللل شيء من اول وجديد وبكميات هائله ليه :(
نصيحة ركزي على الجودة اكثر من الكمية .

Go Classic استثمري بالكلاسيك


طبعاً فيه فكرة انصح فيها انك ضمن جهازك تشترين شيء كلاسيك وثمين كأنك تستثمرينه لبعدين لأنه راح يبقى لك ( المقصد بـ ثمين مو تطيرين نصف فلوسك على قطعة وحده هالشيء يختلف حسب ميزانية كل وحده )  اعطيكم مثال : مثلا محفظة شانيل ، شوز لوبوتان اسود او نود ، أي شوز من براند مرتب  يكون سمبل ولون عملي هالأشياء ماراح تطير نصف الميزانية بس تبقى ثمينة و لو الميزانية تساعد عندك خيارات اوسع ،
القطع التريندي قللي منها لكن لاتمحينها نهائي لأن يضل لك شكلك كـ عروسة

هالشيء مو معناته تضغطين على نفسك وتشترين كل شيء ماركات ، بس المقصد حاولي تشترين لو شيء واحد كلاسيك . ان شاء الله وصلت الفكرة ❤

 

لاتعلنين للعيادات او الصالونات انك عروسة

لما تروحين تسوين تريتمنت او أي علاجات وتقولين انك عروسة هنا اعرفي انهم راح يشفطون فلوسك ، روحي وانتي عارفه ايش حابه بالضبط و سويه لأن غالباً بيعطونك أشياء إضافية ماتحتاجينها ويغلون السعر عليك .
أوكي قولي انك عروسة للميك اب ارتست والشعر ودلعي نفسك لكن بالعيادات انتبهي عن تجربه :(


هذي النقاط اللي احس مهم تحطينها فـ بالك قبل تبدأين بالتجهيز .

 

ننتقل للعناية و الـ NEW LOOK


النيو لوك حددي بالدفتر ايش حابه تسوين :

تغيرين ستايل شعرك أو لونه ، تسوين اسنانك ، تريتمنت للبشره كلها سجليها على شكل نقاط بعد كذا سجلي عندها مين اكثر شخص يمدحونه لهالشيء وتقررين بعدين مين تختارين فيهم !

الحين بقولكم ايش جربت ولو انصح فيهم أو لا :

بشرة الوجه :


ضروري تهتمين من هالناحية ولاتبخلين على نفسك ،  انا كنت لسى مخلصه الجامعه والشمس  مأثرة على وجهي فـ قررت اسوي تقشير ديرما ميلان .. سويته عند هبة فاروق في عيادة أيمن آل الشيخ اسمها Via center بالرياض
التقشير هذا مكلف نوعاً ما ، لكن يستاهل لو انتي فعلاً محتاجته والحمدلله راضيه عن نتجيته .
 شكيت منهم بالتويتر قبل كذا انهم يكنسلون المواعيد قبل ساعة واكون ضربت مشوار للرياض! وهالشيء ضايقني بس الحمدلله من بعدها ماتكرر .

اذا بشرتك كويسه بس يبي لها شوي اهتمام ابعدي عن التقشير وخليك عالكريمات وتنظيف البشرة كفايه .

الدكتورة اعطتني لاين عنايه مره حلوه ومافيها مواد ضاره بالعكس مكوناتها لطيفه لكنها مكلفة شوي فـ راح اعطيكم الزبده حقتها وافضل شيء فيهم :

 اللاين اسمه excellent  وموجود في صيدلية العناية بالبشره .
الغسول حقه مره جميييل انصح فيه من قلبي فيه احماض فواكه ويعطي البشره قلو ونظافه وكان  بميه وشيئ معقول بالنسبه للكريمات
وسيروم فيتامين سي دائماً كويس يعطيك نضاره ومو شرط براند معين ..

الدكتورة تجنن وحبابه وترد عليك على طول بالواتساب مهما ابثرتيها ههههههههه بس روحو لها وانتو عارفين ايش تبون بدون أي زياده والا بتطير فلوسكم لو طاوعتوهم -.-

العناية في الجسم :


خذي الأمور ببساطه تامة ، انا فاهمة شعور كل وحده عشان كذا بعطيكم الخلاصه وكيف ان الأمور مره بسيطه :

عندك مشكله جلدية فعليه اتجهي للطبيب ، عندك اختلاف لون بسيط بالركب والأشياء هذي مو ضروري ترا تقشير مجرد روتين بسيط تمشين عليه بيحل لك الموضوع . طبعاً لو كانت غامقة فعلاً هنا يكون دور التقشير

تجربتي :

ركبتي احترقت من الليزر واغمق لونها شيء بسيط  فـ توترت قلت ماعندي وقت ليمون وكريمات لازم اسوي لها تقشير ، طبعاً سويته بنفس العيادة وكان تركيز الـ tca اقل شيء بحيث الباقي عالكريم المفتح .
كان فيه نتيجه  بس بصراحه ماتسوى بسيطه لو رجع فيني الوقت ماسويتها لأن ماتستاهل ادفع عليها وكان دلع بنات -.-
ولما كملت على روتيني عادي رجع لونها فـ ماكان له داعي التقشير

روتيني :

سكرب للجسم من هيليا براين Heliabrine  هنا صورته

انصرف لي من دكتورتي ، هو مو سكرب عادي مثل بودي شوب وكذا ، هذا مخصوص للتصبغ فيه احماض فواكه ومكونات مفيده وفعلاً يخفف من التصبغات و يعطي نعومه ونظافه جميله ، تستخدمينه بكل شاور على الأماكن الغامقه ، ومره بالأسبوع لكل جسمك .
استخدمته لـ يديني ورجولي تكرمون لأنها كانت مغمقه من شموس الجامعة ، والنتيجة الحمدلله كانت مرضية جداً وانصح فيه .
طبعاً مافيه نتيجة بدون استمرار لازم نتذكر هالشيء .
 (تلاقون السكرب في صيدلية العناية بالبشره أو امازون)

بعد السكرب اعتمدي كريم او لوشن فيه زبدة الشيا ، تلاقون في موقع iherb خيارات كثير (يوصل مباشر) واللي ماتعرف تطلب تعطيني خبر لأن اعرف وحده ثقه وتطلب بعموله مره بسيطه .

وهذا هو الروتين البسيط مجرد سكرب هيليا براين + لوشن ❤

تجربتي في الأسنان :

من سنتين وانا مركبه بريسز وفكيته قبل الزواج بأسبوع الحمدلله لحقت لكن مالحقت اسوي تبييض قوالب اللي كل الأطباء ينصحون فيه وشفت نتيجته على كثير فضيييع!
فـ اضطريت اسوي تبييض zoom بالعيادة بالليزر ، كان فيه الم الليزر بالأسنان ينرفز :(  ممنوعة من القهوة ، وكانت النتيجه حلوه للزواج بس ،
بعد الزواج هجمت على القهوه وخلال أسبوعين النتيجه تغيييرت كثير فـ ما انصح فيه الا للزنقات .
كان سعره 600 أو 800  بعيادة الماس لطب الأسنان بمخرج 10 و 5  وهي نفسها العيادة اللي ركبت البريسز عندهم
 

 الليزر :

سويت الليزر بنفس المركز Via center بس ما انصح فيه لأنه مره غالي هناك وانا اضطريت لهم عشان يكون بنفس المكان اللي اراجع فيه بما اني اسافر للرياض .. فـ صراحه فيه فرق كبير بالأسعار بينه وبين باقي المراكز .
دوري على افضل الباكجات والعروض دائماً .
 

تشقير الليزر :

مره جميل انصح فيه تسوينه على الأقل قبل الزواج لحواجبك عشان يضل على الشكل المرتب وترتاحين بالهني مون .
طبعاً ماطيح شعر الحاجب ولا شيء لأن نبهت الطبيبه ، التشقير يكون نظيف ونفس لون الجلد ويطوول معاك
فيه مراكز كثيره تسويه مثل الإستشاري وفيه مستوصفات برضو بس ماتحضرني أسمائهم .
 
فيه نوع اسمه تشقير سبكترا ، كويس لـ وبر الوجه
بـ اول جلسة يتشقر الشعر وماتحسين بألم ، بالرتوش تحسين بألم ويبدا يطيح
السبكترا يقولون انه مفيد للبشرة نفسها بس ماقدر افيد من هالناحيه لأن سويته مره وحده بس .
لو استمريتي بجلسات كل مره يطول مايطلع وهكذا . افضل بكثييير من الليزر للوجه
 
 
وهذا كل شيء لتدوينة اليوم .
يارب أكون مانسيت شيء ، لسى باقي بوست ثاني ان شاء الله عن الفستان واللوك ومواقع والخ ❤ وممكن لو ماكفانا نخليهم بوستين زيادة .
حاولت اختصر واعطي معلومات بنفس الوقت ، انا تركت الـ ask بس برجع له هالفتره عشان ارد على أي استفسار بخصوص هالموضوع لأن ادري راح تبقى تساؤلات :* الأسك هو Beautyderosee
 
 
يارب البوست اعجبكم واستفدتو منه واشوفكم على خير ان شاء الله
 
Byeeee
 
 

Nada

 
 

Beauty De Rosee All rights reserved © Blog Milk - Powered by Blogger