♥ميك أب الصباح♥ كل شيء يخصه من إلى !!

السلام عليكم ورحمة الله وبركاته

زي ماشفتوا بالعنوان هالبوست بيكون عن ميك اب الصباح من الى !! تعبت على البوست شوي عشان كذا اتمنى تسوون ريتويت وتشاركون المدونه مع غيركم عشان الكل يستفيد ولايروح تعبي  والكل يشوف البارتات اللي بحطها :$ ♥♥♥

طبعاً اليوم بحكي لكم عن المنتجات اللي راح تحتاجينها لميك اب الصباح ، كل اللي بحطه لكم عن تجربه ان شاء الله واذا فيه اشياء ماذكرتها من قبل فتأكدو بسوي عنها ريفيو مستقبلاً :$ .. قسمت لكم المنتجات : هاي إند ، ودرق ستور

ايش الهاي إند ؟ هي الماركات اللي موجوده بوجوه وسيفورا مثل شانيل وديور وميك اب فور وما الى ذلك .. أما الدرق ستور هي ماركات سنتر بوينت مثل ريفلون وريميل واسعارها معقوله وبمتناول الجميل

زي ماقلت لكم قسمت لكم الميك اب قسمين بتلاقون مكتوب على الصوره هاي اند ودرق ستور ، طبعاً كل وحده وذوقها وميزانيتها ممكن  تنوعين وتشترين من الهاي اند والدرق ستور والا تاخذين كله من الدرق ستور والعكس .. أحس اني حستكم :$ خلينا نبدا احسن :$

أول شيء وأهم شيء هو : الفاونديشن أو التينتد موسترايزر أو البيبي كريم .. بالمختصر المنتج اللي بتستخدمينه عشان يزين بشرتك ، شوفو معاي هالصوره

على اليمين 2 فاونديشنز من الدرق ستور .. واحد بورجوا هيلثي ميكس اتوقع كلكم سمعتوا فيه وتعرفونه من أفضل الفاونديشن بالدرق ستور رائع جداً ومناسب للصباح يعطيك تغطيه حلوه بس انه خفيف ويوحد لون البشره .. مره جميل حتى ريحته حلوه ♥ اما الثاني هو ريفلون كولور ستاي تغطيته اثقل من بورجوا بس كثير حلوووووو ومنظره على البشره يبرد القلب ♥ فيه منه انوع لكل البشرات الدهنيه والعاديه والجافه يعني كل وحده بتلاقي اللي يناسبها إن شاء الله

بما إنه هالفاونديشن هو اثقلهم بقولكم كيف تستخدمونه الصباح : تغسلين وجهك وماترطبينه بس على طول حطي الواقي لأنه بيرطب .. بعدين خذي من الفاونديشن هذا وحطي نقط على الأماكن اللي محتاجه تغطيه مثلاً حول انفك فيه حمار حطي نقط بهالمكان ، على خدودك او ذقنك فيه اثار حبوب مثلاً حطي نقط بس نقط صغيره مو مثل لما بتروحين عزيمه ههههههههههههه :$ .. لما تخلصين منقطه بتحسين انك معنقزه بس معليش :$ ابدي ادمجي النقط مع باقي المناطق يعني وزعيه بشكل ناعم بحيث يندمج مع لون بشرتك ويغطي الأماكن اللي تبين ولايطلق مترقع :$ يارب فهمتو هالطريقه عاد ♥

كذا خلصنا من فاونديشنات الدرق ستور ولو بتقولون لي ناخذ اي واحد بورجوا او ريفلون بقول بورجوا انسب للصباح واخف  .. نجي للهاي إند :

مو شيء جديد حاطه بيبي كريم ديور ، تكلمت عنه كثير عشان كذا بأكتفي بقولي انه مناسب للصباح لأنه يعطي تغطيه + حمايه من الشمس 50 + نضاره بنفس الوقت ..

أما الفاونديشن الثاني شانيل فيتالوميير أكوا .. جمييييل هالفاونديشن ومستحيل احد يشتريه ولايحبه ♥♥♥ بينفعك بطلعاتك وعزايمك وبالجامعه بعد لأنه مره خفيف وحلو على البشره بس بنفس الوقت يعطي تغطيه كافيه ورائعه ولوك ديوي !! ♥

بما إننا خلصنا من الفاونديشنز الحين بذكر نقطة الحمايه من الشمس .. البنات المستجدات لاتستهينون بالحماية من الشمس لو تركتوه بتندمر بشرتكم حرام : ( عشان كذا حافظو عليها واشترو واقي شمس .. الواقي اللي جربته هو فيتشي ♥♥♥ يهبل خفيييف مو مثل الواقيات الباقيه تكتم وثقيله .. مع انه بشرتي جافه بس مستحيل اخذ واقي فيه نسبة ترطيب ما احبهم أبداً !! فأجيب واقي خفيف للبشرات الدهنيه واحط معاه نتفه من المرطب تبعي ويمشي تمام ..

واقي شمس ثاني ماجربته بس سألت لكم وحده جميله بشرتها دهنيه وكانت تمدحه .. من بايوديرما اسمه فوتوديرما ..

يعني الحين انتي راح تصحين الصباح وتغسلين وجهك الجميل بعدين تحطين واقي الشمس تبعك وتستنين شوي وتحطين الفاونديشن .. ♥

ماجبت سيرة التينتد موسترايزر لأن للحين مافيه شيء عجبني مره .. بس للي يحبون الخفيييف جداً ممكن ياخذون من الفاونديشن نقطه ومن المرطب تبعهم نقطه ويخلطونه ويحطونه مره حلوه هالطريييقه اذكر كنت اسويها مع فاونديشن بورجوا واحب النتيجه تخلي الوجه صحي ولا كأنك حاطه شيء بس بشرتك زانت ♥!

ننتقل للباودر .. شخصياً ما احط باودر بس فيه بنات يحبون يحطون واكثر شيء اللي بشرتهم دهنيه عشان كذا بذكر نوعين باودر خفيييفه وتناسب الصباح ماراح تخلي وجهك مغبر ان شاء الله

اللي هي باودر ماك منيرال سكين فينيش .. وبالمقابل باودر ارخص منها مايبلين دريم مات باودر .. السعر اللي حطيته لمايبلين مو متأكده منه بس بهالحدود :$

خلصنا من الفاونديشنز والباودر وان شاء الله كذا كل الأطراف راضيه :$

نجي للعيون :

أغلبهم من الدرق ستور لأنهم كلهم حلوووين .. أول شيء قلم حواجب من مايبلين او ريميل كلهم حلوين ، كحل مايبلين الجل جمييييل ثابت وأسود سواء رسمتي فيه فوق أو تكحلتي من جوا اضمن لك ماراح يسيح ويحوسك ! وحطيت لكم كحل سايل للي يحبون السايل من ريميل ثابت وأسود بس فيه كحل احلى منه من مكياجي ! سواده وثباته ♥♥♥  بس مالقيت صورته ..

ماسكرا بورجوا فوليومايزر زي ماحكيت لكم فيها فرشتين وحده تطول و وحده تكثف بالصباح استخدم وحده منهم مو كلهم .. عشان ماتطلع أوفر

أحب هالماسكرا لأنها ماتخلي الرموش ناشفه والا يابسه أكره شيء عندي <_<

وطبعاً عاكف الرموش ..

يبقى كونسيلر قارنيير الخفيييف الجميل ، ماراح يعطي تغطيه زينه زي الكونسيلرات الباقيه مثل بوبي براون أو ماك .. بس بينور المنطقه وبيخفف من الهالات بشكل معقول ومناسب للصباح وقوامه حلو يرطب ..

وآخر شيء لون نحطه على مدمع العين عشان يفتح العين ويعطي الوجه قلو ♥♥♥

عندك خيارين يا تاخذين من ماك "كريم كولور بيس .. لون بيرل " أو خيار ثاني من الدرق ستور تاخذين آي شادو من نيكس  .. وبحط لكم الوان من نيكس تناسب تحطينها على مدمع العين :

Cream cheese

Dust

Salmon

Vanilla sky

Highlight

أوكي خلصنا من العيون .. نجي للشفايف + الخدود

أنا انسانه ماحب احط روج بالجامعه ولا قلوس .. نادر احط قلوس الا اذا كان من النوع الخفيف مايدبق ، احب الأشياء اللي تجي ترطيب ولون مثل جيفنشي اللي حكيت لكم عنه في البوست السابق وحطيت لكم اشياء نفس اللي احبها

نبدا بالدرق ستور .. طبعاً اووول شيء بتاخذينه لشفايفك للجامعه هو ريفلون ليب بترز !! اللي هي تجي مرطب + روج + قلوس ، مره مناسبه للصباح وماشفت لها بديل بالهاي اند صراحه ،

الخيار الثاني بالدرق ستور هو " ميبلين بيبي ليبس " اتوقع لسى مانزل عندنا ، انا طلبته من امازون هو مره رخيص نفس اسعار مرطبات الشفايف بس بما اني مهووسه بمرطبات الشفايف الملونه قلت لازم اجربه ، أعجبني مره ترطيبه ولونه بينك ناعم بس مايطول مره على الشفايف لكن علبته تشفع له سريعه تحطين كل شوي عادي ! ♥

نجي للهاي إند :

كل هالثلاثه ينفعون للشفايف وينفعون بلاشر .. يعني 2 بواحد

أول شيء جيفنشي قلت لكم عنه  بيعطيك لمعه قلوس حلوووه ، بوبي براون ميزته الوانه اكثر من جيفنشي اللي هو لونين بس بينك ومشمشي .. بوبي براون ماراح يعطيك لمعه زي لمعة جيفنشي كأنك حاطه قلوس بس انه مره جميل

أما ماك مافييه لمعه بس انه مو ناشف بنفس الوقت يعني متوازن أحسه ، ثباته مو ذاك الزود بس برضو حلو انه فيه منه الوان متعدده وانه تستخدمينه كبلشر يعني وانتي مستعجله كلهم بينفعووونك !

الشيء اللي ماحبيته بهالثلاث كلهم هو علبتهم .. تاخذين المنتج بإصبعك !! بس نتيجة جيفنشي مخليتني اشفع له بعلبته ♥

حبيت علبة الريفلون ليب بترز كأنه روج سهل وريميل بعد ..

أمممم كذا يبقى اقولكم عن البلشرات .. عندك خيارين اذا تبين شيء رخيص لاتاخذين الا من نيكس لاتروحين بورجوا ولا ماكس فاكتور .. نيكس افضل بلشرات بالدرق ستور والوان البلشرات مو مررره كثيره وتحوس فـ روحو وخذو اللي يناسبكم ..

الخيار الثاني طبعاً ماك ..أحب استخدم بلشر كريمي بالصباح عشان كذا بحط لكم الوان بلشرات من ماك كريميه وللصباح :

So Sweet > لونه جميل باربي بينك كذا

Something Special > للي يحبون المشمشي

Tea Petal > هاللوان واااااو بس لو شفتوه بالمحل بالعلبه لاتخافون ! لونه بالعلبه غامق بس على  الخدود جمييييل

Brit Wit < هذا لازم تاخذونه أووول واحد ياجماله بس .. يعطي وجهك قلو واللي يشوفك يحتار وش حاطه مايبين انك حاطه بلشر ينادي !!

Ladyblush < مشمشي بس لونه ادفى واهدى من اللي قبل " سوم ثينق سبيشال "

Posey  < بينك جمييييل اغمق من أول واحد ..

خلصنااااا ♥♥♥ يبقى الأسعار واماكن الشراء ( بنات اعذروني الأسعار تقريبيه مو بالضبط لأني ناسيه )

بورجوا هيلثي ميكس 70 تقريباً ( سنتر بوينت )

ريفلون كولور ستايل 80 تقريباً ( سنتر بوينت )

ديور سنو بيبي كريم 250 ريال ( وجوه )

شانيل فيتالوميير أكوا 250 ( وجوه .. سيفورا )

قارنيير كونسيلر 30 ( صيدلية بوتس .. الهايبر ماركت )

ماسكرا بورجوا فوليومايزر 60 ( سنتر بوينت )

كحل مايبلين السايل 25 ( سنتر بوينت .. صيدلية بوتس )

كحل مايبلين الجل 50 ( سنتر بوينت .. صيدلية بوتس )

قلم حواجب ريميل ومايبلين مو أكثر من 40 ( سنتر بوينت .. صيدلية بوتس )

آي شادون يكس 35 ( سنتر بوينت )

ماك كريم كولور بيس 80 ( ماك )

جيفنشي للشفايف والخدود 150 ( وجوه )

بوبي براون للشفايف والخدود 150 ( هارفي نيكلز )

ماك للشفايف والخدود 70 ( ماك )

ريفلون ليب بتر 50 ( سنتر بوينت )

مايبلين بيبي ليبس 25 ( أمازون )

باودر ماك مينيرال سكين فينيش 130 ( ماك )

باودر مايبلين ستاي مات 60 ( سنتر بوينت .. صيدلية بوتس )

بلشرات ماك 90 أو 80 ( ماك )

هالبوست مو شرط لميك اب الصباح .. كثير اشياء منه استخدمها للطلعات والعزايم يعني اللي يحبون الشيء الناعم الخفيف بيستفيدون منه ان شاء الله

كذا نكون خلصنا كل شيء يخص الميك اب ♥_♥  لسى باقي بارتات تخص تجهيز الجامعه انتظروها بكرا ان شاء الله :$

مع السلامه .. أشوفكم على خير :$

أحبكم ♥