عطر هذا الشهر : banana republic wild blossom

 

السلام عليكم ورحمة الله وبركاته

 

كيفكم ياجميلات ♡ اليوم واخيراً ببدا سلسلة العطور :$

برمضان سألتكم حابين تشوفون كل شهر تدوينة " عطر هذا الشهر "؟ وكثير شجعوني ياحبي لهم

اللي هي كل شهر بسوي ريفيو عن عطر وماراح تكون مقتصره على عطوري وبس ! بجيب لكم عطور من اهلي وصديقاتي عشان نرضي كل الأذواق ♡

العطر هالشهر عطر لي اخذته من شهر وشوي واحس كل يوم احبه اكثر ..

بقول لكم كيف ذوقي في العطور عشان تفهمون علي بالمرات الجايه ان شاء الله لو تكلمت عن عطر لي ..

أحب العطور البارده والفريش واللي فيها ورود ، وتكون تندمج مع الريحه الشخصيه ويطلع العطر كأنه ريحتك انتي ماكأنك حاطه عطر < وصفي يضحّك هههههههههههههههههه :(  ..
من العطور اللي احبها " كلوي ، مارك جيكوب دايزي ، كوكو شانيل "
 

العطر اللي بتكلم فيه اليوم هو عطر من بنانا ريببلك ♡ أسمه Wild
Blossom

 

 













 

اكثر شيء شدني فيه "غير ريحته" انه مو مره منتشر يعني لما احد يشمه فيني يحتار فيه مايدري وش حاطه ؟ ولما اخذته كنت مبسوطه اني ماراح اطقم مع احد بالريحه غالباً :$

وصف العطر : ورود مع فواكه واشياء ثانيه ماقدرت اميزها

بحثت عنه ولقيت هذي مكوناته : كمثرى ، قريب فروت ، زهرة الكاميليا البريّه ، وقاعدته خشب البتشول والصندل والمسك

 

 

الورده اللي بالنص تنشال وتقدرين تلبسينها اسواره " عارفه مو حلوه :D"

وهنا لما شلت الورده

رأيي فيه : العطر رائحته جميله راقي وفريش وانثوي جداً جداً ♡ والعلبه كيوت ..

الشيءاللي ماعجبني فيه : ثباته متوسط مو مره ، مع انه إي دو بارفيوم مو تواليت .. كنت اتمناه ثابت اكثر

ولأني حابته صرت اعطر فيه ملابسي قبل البسها بوقت ، واذا لبستها اتعطر ثانيه وحسيت الثبات تحسن شوي ..

 

لاتحكمون على العطر من أول بخه ، انتظروه يبرد يطلع اجمل بكثير ♡

 

يجي حجمين كبير و صغير ، اللي معاي هو الكبير 100 مل ، وسعره 360 اما الحجم الأصغر 50 مل اتوقع والسعر 280 كذا ! يعني لو احد بيشتريه ياخذ الكبير أوفر له

مكان الشراء من دبنهامز المملكه ..

 

وبس :$ ان شاء الله يكون عجبكم البوست وعجبتكم الفكره وحابين تشوفونها بالمرات الجايه

اشوفكم على خير ♡ مع السلامه