ماهو الستروب كريم من ماك ؟ وماهي استخداماته ؟

السلام عليكم ورحمة الله وبركاته

كل عام وانتو بخير ياجميلات ❤  حبيت اسوي بوست قبل العيد وفيه بنت الهمتني اسوي هالبوست اللي كنت مجهزته من زمان بس ناسيته والله يعافيها ذكرتني :$
البوست  بيكون عن منتج من ماك جميل وله استخدامات متعدده ومو الكل يعرفونها .. اللي هو ستروب كريم

خلوني اول شيء اقولكم ايش هو ستروب كريم ؟
هو عباره عن كريم مرطب وفيه فايتمينات ومكونات مفيده مثل الشاي الأخضر .. هذا الكريم مو مصنف انه كريم عنايه بحت ، يعني مو مثل كريمات الليل اللي نحطها وكذا ، لا هذا كريم نستخدمه استخدام تجميلي لكن بنفس الوقت فيه مكونات مفيده  
الشيء المميز فيه انه فيه لمعه بس مو لمعة قليتر مزعجه ، لا لمعه ناعمه اللي الكل يدورها ويسمونها لمعة هوليود او الديوي وهذا سواتش له عشان تشوفون كيف لمعته .. هالمنتج مثالي لما تجيك ايام بشرتك مرهقه وتعبانه وذابله ، تحطينه كمرطب بعدين تحطين الفاونديشن او الباودر او حتى تخلطينه مع الفاونديشن وبيخليك مصحصحه وبشرتك تكون افضل ..

سواتش "من قوقل"



الشكل التقريبي لما تستخدمين ستروب كريم :

ايش استخداماته ؟
كثير يشترونه ويحتارون فيه مايدرون ايش يسوون فيه وكيف يستخدمونه .. بس مع الإستخدام تكتشفين كيف وخلوني اقولكم على استخداماته :
-          تخلطينه مع الفاونديشن ويعطيك لوك ديوي وصحي جميييل طبعاً هو حلو مثلاً لو بالصباح تبين تحطين شيء خفيف بس ماتبين فاونديشن ، ممكن تاخذين شويه من فاونديشنك وتخلطينه مع هذا الكريم وبيجي خفيييف وفيه لمعه صحيه وحلوه وتناسب الصباح أما لو بالليل وبالعزايم تقدرين تخلطينه بس احرصي يكون الفاونديشن تغطيته عاليه عشان مايخففه لك .. برضو لو عندك فاونديشن مات وتبين لوك ديوي اخلطيه معه ويعطيك لوك ديوي ..

-          بما انه فيه لمعه تقدرين تستخدمينه على جسمك في المناسبات ، على كتفك وصدرك والسيقان ويعطي لمعه بالضبط زي هوليود ، وياسلام لو عندك شيمر تان سائل وتخلطينه مع هالكريم بيعطي افيكت رائع على الجسم

-          استخدامه الطبيعي واللي بيجي على بالك على طول ، قبل الفاونديشن رطبي بشرتك فيه بعدين حطي الفاونديشن بتلاقين بشرتك منوره وفيها لمعه حلوه خصوصاً تحت فاونديشن مات اللي احياناً يخلي البشره باهته

-          استخدام آخر جميل واحبه هو انك لما تخلصين ميك اب ، تاخذين من هالكريم وتحطينه بمناطق بوجهك تبين فيها لمعه وتكون بارزه مثل عظمة الخدود والجبهه وتحت الحواجب " تحطينه على شكل نقط صغيييره بعدين تطبطبين ولاتفركينه عشان مايمتصه الفاونديشن "
-          ممكن تستخدمينه مع بيقمنت عندك "تاخذين شوية مره بيقمنت وتخلطينه مع الكريم هذا " ويصير معاك بلش كريمي جميل
-          أو تحطينه فوق البلش وتجي خدودك فيها لمعه بس اهم شيء كثري بلشر قبل تحطينه لأنك لما تحطينه بيخلف لون البلشر .. نفس هالصوره


اممم هذا اللي في بالي الحين وان شاء الله ما اكون نسيت شيء ، على فكره هالكريم فيه منه حجم صغير للسفر فحلو انكم تاخذون هالحجم وتجربونه قبل تشترون الكبير
سعره تسعين يمكن أو ميه .. الحجم الأصغر مدري بكم بس سعره معقول اتذكر
مكان الشراء من ماك
الشيء اللي حابه اقوله بما انه البوست عن منتج يعطي ديوي لوك ..
الديوي لوك يعتمد على بشره نظيفه وصافيه ، يعني قبل تسوين هاللوك احرصي تنظفين بشرتك بالبخار وتشيلين الرؤوس السوداء وتشيلين فتله عشان يجي معاك حلو وبيرفكت ، ما اقول لازم البشره تكون طبيعتها صافيه ، اهم شيء نظيفه وتقدرين تغطين الحبوب او الاثار بالكونسيلر والفاونديشن بعدين تستخدمين الستروب كريم هذا
وآخر شيء تذكرو انه كل بشره تختلف عن الثانيه وكل وحده وذوقها واستخدامها للميك اب ❤ فيه ناس تحب الشيمر الباودر وناس تحب شيء ديوي وكريمي وهالناس راح يعجبهم هالمنتج ان شاء الله ..

خلصنا هالبوست ، اشوفكم على خير ان شاء الله
مع السلامه :)
You may also like:

20 comments

  1. ماشاء الله عليكي صراحة اول مرا اعرفه ... حبيتوا خصوصا انو اللمعه فيه مش قوية ومزعجه ... مشكورة ياقلبو ^__^

    ReplyDelete
  2. تدويينةبططططله ياندى :*
    الكريم هذا مرة حلو كـ بيس للبشرات الجافة ، وكل الإستخدمات اللي قلتيها ..

    ثانكس ياجميلة ❤

    ReplyDelete
  3. انا استخدمه بس عندي سؤال وحدة قالت لي عادي استخدمه بلحاله زي مثلا الصبح قبل الجامعة انظف وجهي و احطه و اروح ينفع ولا ماينفع ؟

    ReplyDelete
  4. شككككرررررررررراااا ياا أأاممر

    ReplyDelete
  5. شكراً حبيباتي على التعليقات اللطيفه ❤
    Dareen
    لو بشرتك مره مثاليه ممكن تحطينه لوحده ، بس هو مافيه لون ولا شيء مجرد ترطيب واللمعه اللي قلتها
    زي ماقلت لو تبينه استخدام صباحي اخلطي معاه شوية فاونديشن ❤

    ReplyDelete
  6. شكراا حبيبتي
    دااايم مواضيعيك سااحره
    واطرائك للموضوع يعجبني تحمسين الي يقرا للمنتج
    علطول سيفت الموضوع��
    الله يتمللك عافيتك

    ReplyDelete

Thank you beautiful ! شكراً لتعليقك ياجميلة

© BeautyDeRosee. Design by MangoBlogs.