روتين العنايه بشعري | Hair care routine




السلام عليكم ورحمة الله وبركاته
اخيراً صلحت البلوق ورجعت للتدوين ! الحمدلله يارب .
كيفكم ياجميلات ؟ اتمنى تكونون بأحسن حال
اليوم راح احكي لكم عن روتين العنايه بشعري وبعض الستيبس المهمه ،

قبل ابدأ في روتيني ، بقولكم نصائح مره مهمه وممكن تكون بنظركم بسيطه بس لما تطبقينها بتشوفين فرق كبير بشعرك ! :

-        لو لاحظتي تساقط وتعب بشعرك اول شيء تسوينه تعملين تحاليل وتشوفين لو عندك فقر دم او أي مشاكل تأثر على شعرك ، لأن الشعر يتغذى على الدم ..

-        قبل تهتمين في الشامبو والتريتمنتز ، اهتمي بأكلك لأن الغذاء الكويس هو اللي فعلاً راح يجيب نتيجه وينعكس على شعرك وصحته

-        لاتهملين نقطة تمشيط الشعر ، اولاً تمشيط الشعر راح يحرك الدوره الدمويه براسك وهالشيء مهم لصحة شعرك وقوته ، ثانياً لما يكون شعرك متشابك يتعرض للتساقط اكثر عكس لما يكون ناعم وخالي من التشابك

-        بين فتره وفتره حاولي تاكلين فايتمنز راح تفيد شعرك كثير واظافرك

-        لاتغسلين شعرك يومياً ، وبنفس الوقت لاتطولين بين الغسلات وتخلينه يدهن ! لما يدهن شعرك بتكون جذوره ضعيفه فبالتالي يكون عُرضة للتساقط

-        دائماً مشطي شعرك وهو 50 % مبلول بمشط اسنانه وسيعه وتكون الأسنان نهايتها مدببه .. لما تمشطين ابدأي من تحت لين فوق ، وانتبهي من المشط العادي على الشعر المبلول جريمه

-        اهتمي بترطيب شعرك من خلال البلسم والماسكات ، الترطيب مهم كثير عشان تحصلين على شعر متغذي وشكله جميل

هذي اهم الستيبس واللي بعضها كنت غافله عنها لكن لما تقيدت فيها شفت فرق بشعري الحمدلله .. احياناً يكون سبب المشكله بشعرنا شيء بسيط واحنا مانحس فيه !

روتيني :




·         * مرتين في الأسبوع استخدم شامبو منقي ومطهر لفروة الراس وبعدها استخدم ماسك معالج و ترطيبه عميق
·         * باقي الأيام استخدم شامبو عادي وبلسم
·         * مرة وحده بالأسبوع اسوي تريتمنت وغالباً يكون زيت جوز الهند


الشامبو المنقي والمطهر هو شامبو BIG من Lush ، والماسك هو ماسك الماكديميا
زي ماقلت هالشيئين استخدمهم مرتين بس بالأسبوع وبالنسبه لي هم مزيج بيرفكت ..



الشامبو BIG



حبيته كثير كثير ، هو عبارة عن شامبو بأملاح البحر ينقّي ويطهر فروة الراس ويشيل كل الترسبات العالقة فيها ، ولأنه شامبو منقّي راح ينشف شعرك شوي عشان كذا استخدمه مع ماسك الماكديميا
الشامبو مناسب لكل انواع الشعر وراح تلاحظين لمعة وفوليوم "حجم-كثافه" بشعرك
زي مانتو شايفين الشامبو فيه زي الحبيبات اللي هي الأملاح ، ريحته جمييييله ومنعشه وسبب هالريحه هو مزيج النيرولى والفانيليا والآيريس ..

احياناً لما يكون ماعندي طلعه او دوام ، استخدم هالشامبو لوحده بدون ماسك او بلسم عشان اريح شعري واخليه يتنفس ..

الماسك macadamia deep repair mask

يستاهل كل المدح والشهرة اللي جاته ! من جد ماسك جميل ترطيبه عميق عمييييق يترك الشعر ناعم وفيه لمعه ويخفف النفشه كثير ، مكوناته هي زيت الماكديميا والأرقان وهو مخصص للشعر التلفان والمتضرر بيرجع له نعومته وحيويته وبتشوفين هالشيء من اول استخدام ، هذا غير ريحته الفتنه والفريش واللي تبقى بالشعر وقت طوييييل يعني من بكرا لو فكيت شعري او حركته تنتشر الريحه كأني توي متحممه .. ريحته بالضبط نفس ريحة شامبو هيربل المنعشه !
لما استخدمت هالماسك حسيت شعري كان عطشان قبل ، والأهم انه مكوناته مفيده وطبيعيه تستخدمينه وانتي متطمنه عكس ماسكات قارنييه ولوريال وغيرها

ممكن تحسون سعره غالي بس يستاهل كل ريال وراح يجلس لك وقت طويل لأن شويه منه تكفي الشعر كله ..

طريقتي فيهم :

اغسل شعري بشامبو BIG بعدين اقسم شعري نصفين وابدا اوزع الماسك واحط الشاور كاب واكمل روتين الجسم والوجه على مايخلص الماسك ، اتركه تقريباً 10 دقايق بعدين اغسله .. ولما اغسله ما اخلي الماسك يروح 100 % من شعري ، يعني اخلي يبقى 10 % كذا :) بهالطريقه يكون شعري ليّن ومترطب كويس والريحه تمسك اكثر

باقي ايام الأسبوع - الشامبو :

اغيّر بين هالأثنين
mane tale
avalon organics
 و مين تيل بالنسبه لي احسن لكن خذو الأخضر اللي مكتوب عليه herbal grow افضل بكثير من اللي بالصوره ..

شامبو مين تيل الأخضر كويس للتساقط ولاحظت انه يطول الشعر فعلاً ويعطي الشعر حجم مايخليه مسطح وطايح ، اللي بالصوره جربته ومو حلو بس حطيته عشان اوضح الفكره لأن الأخضر مو عندي حالياً .
شامبو avalon ماحبيته لكن راح اعطيه فرصه ، سمعت عنه انه كويس للتساقط وانه يعطي حجم للشعر بس لما جربته حسيته ماينظف ابداً وهذا شيء طبيعي لأي منتج اورقانيك بس احس هذا بزياده : / بس فعلاً حسيت اعطاني كثافه غير عن العاده .

 البلسم :


بلسم coolaulin من Lush

هو عبارة عن بلسم بجوز الهند والليمون للشعر الجاف والكيرلي ، مكتوب في موقعهمم انه يعمل على حماية الشعر من التقصف والتلف نتيجة استعمال مجفف الشعر او المكواة الكهرباىيه " الستريتنر"

ترطيبه مو عميق بس حلو كـ بلسم يومي

البلسم الثاني هو aussie three minute miracle

هذا استخدامي له قليل وعند الحاجه لأنه مره ينعم الشعر ولو حسيت شعري بدا يتقصف استخدمه كم مره ويتحسّن التقصف ! هو فعلاً ميركل بس ما احب اكثر من استخدامه لأنه مو من المنتجات الطبيعيه :(


التريتمنتس "المعالجات" :

اكثر شيء استخدمه هو زيت جوز الهند واللي عندي هو النارجيل – حطيته في علبة تونر كلينيك لأن علبته مو عمليه ابداً ..
احس كل بنت لازم عندها زيت جوز الهند لشعرها ، مره كويس للشعر يغذيه ويساعد بتحسن الشعر لو كان متضرر ويحل مشكلة التساقط مع الإستمرار عليه .. ومن اول المرات بتحسين بنعومة ولمعه بالشعر
بس الشيء السيء فيه ريحته مو حلوه ! سمعت عن اللي من وادي النحل انه ريحته حلوه فـ بجربه واشوف ان شاء الله

الشيء الثاني هو Root Stimulator Hair Fertilizer

هو عبارة عن تريتمنت لفروة الرأس واسمه بالعربي سماد الشعر lol ، قريت عنه ريفيوز يقولون انه معجزه يترك الشعر صحي ويطوله ويغذيه ،
بصراحه انا مالاحظت شيء حلو فيه غير انه يطول الشعر ، فـ لو كنتي قاصة شعرك ومتوهقه وتبينه يطول بسرعه استخدميه بتستفيدين منه .. غير كذا ماقدر احكم عليه تماماً

واخيراً حمام زيت بانويل
من الأشياء اللي ما استغني عنها ، حتى لما جبت ماسك الماكاديميا ماقدرت اتركه وصرت استخدمه مره وحده كل اسبوعين او مره بالشهر عشان احافظ على نتيجته وعشاني احبه :$ اول ما استخدمته من سنه تقريباً كان شعري تعبان مره واستمريت عليه هو وزيت جوز الهند اكثر من 3 شهور وتغير شعري للأحسن الحمدلله ، فيه منه نوعين انا اللي استخدمه بالقمح للشعر الجاف وفيه ثاني بالمشمش للشعر الدهني او العادي .. ميزة حمام الزيت هذا انه يصلح الشعر المتضرر ويعطيه ترطيب وليونه  

المنتجات اللي استخدمها بعد الشاور :




كريم تصفيف من ماكاديميا و سيروم لوريال الفيف

الكريم حلو كثير وريحته نفس الماسك منعشه وجميله ، يعطي الشعر ليونه ويخفف النفشه ، طريقتي فيه اني اخلي شعري بالمنشفه عشر دقايق بعدين امشط شعري بمشط اسنانه وسيعه واحط شويه من الكريم على شعري من اذني لين الأطراف واركز عليها ..

السيروم احطه بس لما استخدم استشوار او فير او ستريتنر .. غير كذا اكتفي بالكريم


المنتجات المذكوره :

-          -  شامبو BIG من Lush  سعره 117 فيه حجم اصغر بـ 70 ، فروع lush بالرياض هي المملكه والفيصليه

-          -  ماسك الماكاديميا macadamia deep repair mask سعره الكبير الموجود بالصور فوق بـ 200 وفيه
-          احجام صغير و وسط  متوفر بمحلات نزيه ، وصيدلية نزيه بحياة مول

-          - شامبو mane tale سعره 35 متوفر بصيدلية وايتس + التميمي + الدانوب وبعض الصيدليات الكبيره توفر
ه
-          - شامبو avalon من امازون :

-          - بلسم coolaulin من Lush سعره الكبير بـ 127 والصغير بـ 70 تقريباً

-          -  بلسم aussi من صيدلية بوتس لكن مو فرع السعوديه وتلقونه في امازون :

-          - زيت جوز الهند النارجيل سعره 10 ريال متوفر عند العطارين

-          - Root Stimulator Hair Fertilizer من امازون

-          - حمام زيت بانويل العلبه الكبيره بـ 45 موجود في كل الصيدليات

-          - كريم التصفيف من ماكاديميا حجمه ميني وسعره 35 تقريباً

-          - سيروم لوريال بـ 35 بالصيدليات والهايبر ماركت


وكذا اكون خلصت البوست ، اتمنى استفدتو منه وما اكون طولت عليكم :$ ولو عندكم أي سؤال تفضلو فيه بالأسك http://ask.fm/BeautyDeRosee

اشوفكم في التدوينة الجايه ان شاء الله ، مع السلامه
Love u all




You may also like:

12 comments

  1. جميل جداً ❤
    عندي ملاحظه صغيررررره
    الخط صغير جداً تعبت وانا اقراء مدري الكل كذا او انا عيوني فيها شيء

    ReplyDelete
    Replies
    1. شكراً حبيبتي ، وبالنسبه للخط ولايهمك راح اعدله 

      Delete
  2. ندوووش يا جمييييييله ما هذا *_*
    يمكن اليوم اشوف اول بوست للشعر يناسب احتياجاتي
    للاسف اغلب بوستات البنات تصير محدوده يعني البوست كله عباره عن منتجات واسعار وهل عجبها او لا
    حتى بدون ما تكتب وش فعاليه المنتج نفسه :/
    حبيت اسلوبك كثير
    بس ممكن سؤال من وين فرشه فك تشابك الشعر اللي بالصوره طلبتيها اوين ولا كيف؟ :$

    ReplyDelete
  3. يازينك والله كلك ذوق ، مره مبسوطه انه اعجبك واستفدتي 
    الفرشاة ايوه طلبتها من امازون حبيبتي :*
    شكراً لك

    ReplyDelete
  4. ندوو بوست جميل
    احبك في الله تنحبين يختي الله يخليك لعين ترجيك
    بس ودي اعرف طريقة لاستخدام زيت جوز الهند وبانويل
    الزيت تحطينه ساعتين وتاخذين شاور ؟ والبانويل تغسلين شعرك وتخلينه 10 دقايق ؟

    ReplyDelete
  5. رووعة البوست .. تسلمين ي زينة

    ReplyDelete
  6. البوست جميل الله يعطيك العافية

    ReplyDelete
  7. مره شكراً استفدت منك وجمعت المعلومات إن شاء الله استخدم إللي يناسبني
    بنسبة للمشط انا استخدم الفرش يفرق ؟

    ربي يسعدك
    ويعطيك العافية ق1

    ReplyDelete
  8. جميل البوست مثل عادتك

    حبيت اهتمامك ماشاء الله

    انا معقدني شعري ='(

    خفيف وناعم وخصوصا من قدام مرررررة خفيف والبلسم مايناسب الشعر الناعم يخليه يلزق

    والزيوت تطيح شعري بشكل يخوف

    والحمد لله ما اشكي من فقر الدم

    ReplyDelete
  9. يعطيك العافيه حبيبتي ~ بالنسبه لزيت النارجيل كم يقعد علي الشعر ؟
    و بانويل بس مره بالاسبوع ؟

    ReplyDelete
  10. تعرف على اقل تكلفة زراعة الشعر فى تركيا من خلال التواصل مع العديد من الاطباء المتخصصين فى زراعة الشعر وعلاج كافة حالات الصلع من الاسباب المختلفة فقط اتصل بنا الان لتتعرف على افضل مركز زراعة شعر فى تركيا فقط تواصل معنا الان لتتعرف على المزيد من الخدمات المتميزة زور موقعنا الان

    ReplyDelete

Thank you beautiful ! شكراً لتعليقك ياجميلة

© BeautyDeRosee. Design by MangoBlogs.