سواليف صَبايا .. كيف صار حظي حلو كذا ؟!! :O

السلام عليكم ورحمة الله وبركاته

 

هالفتره حابه انوع في البوستات ماتكون كلها ميك اب في ميك اب بما اني حسيت اني صرت اقرب منكم ❤

وبما ان مدونتي عباره عن تبادل نصائح واحب تشاركوني في الأشياء اللي استفيد منها .. فـ اليوم راح احكي معاكم عن شيء اهم من الميك اب وبتستفيدون منه اكثر وماودي احتفظ فيه لنفسي ابي كلكم تدرون عنه ❤

يمكن كلكم تعرفونه بس ماتفكرتو فيه او اخذتوه جد وآمنتو فيه ..

من العنوان باين ، واتوقع جذبكم صح ؟ :$

كيف صار حظي حلو ؟ كيف صرت اذا بغيت شيء وفكرت فيه الاقيه تسهل او تحقق لي بسرعه وبسلاسه .. ايش السر ؟

السر هو التوكل على الله ❤❤❤ " وكفى بالله وكيلاً " كيف اكتشفت هالشيء ؟

من الشيخ مشاري الخراز الله يسعده ويوفقه ❤

هو شيء مفروض نمارسه من زمان كمسلمين ومفروض عارفينه ومؤمنين فيه ..

الحين اكلمكم كلام بنات ❤ انا مو مطوعه وملتزمه ، مثل كثير منكم اهم ماعلي صلاتي اما باقي الأشياء فالدنيا ملهيتني الله يهدينا جميعاً ويرحمنا برحمته ..

التوكل على الله قريب جداً من قانون الجذب والطاقه بس بطريقه اكثر ايمان :$

تأملو الآيه ( ومن يتوكل على الله فهو حسبه )

و (انا عند ظن عبدي )

يا الله ما اجمل التوكل ، كل همومك وكل امنياتك وكل مخططاتك وكل مصاعبك توكلها على الله والله ماراح يخيب ظنك ❤ اللي ماجربه وجرب هالراحه فاته شيء عظيم ❤

( اذا علمت ان الله ارحم بك من نفسك ، وانه يحب منفعتك اكثر من ما تحب انت ذلك ، وانه الوحيد القادر على نفعك فكيف لاتعطيه كل اعتمادك وثقتك ؟ ) < كلام الشيخ ❤

ودي احكي لكم مواقفي الكثيررررره واللي صارت بفتره قصيره .. بس اشياء شخصيه ❤ بجد انا خايفه احسد نفسي ماشاء الله مو مستوعبه كمية تسهيل الأمور اللي تصير معاي .. وراح اشارككم شيء بسيط وشخصي ياصديقاتي ❤ بما انه يخص المدونه :$

تذكرون لما قلت لكم بالتويتر اني غيرت الكام فجأه ؟ تدرون اني كنت الظهر اهوجس اني اجيب كام احترافيه او شبه احترافيه على الأقل عشان يتحسن التصوير في المدونه وتنفتح نفسكم وادلعكم :$ .. كان مجرد مخطط مستقبلي لأني توي مشتريه اشياء ومستبعده اني اشتريها حالياً ،

والله العظيم بالليل جتني الكام بدون ما اشتريها :o الحمدلله يارب كم انت كريم ورحوم وماتخيب ظن عبادك ❤

يمكن بعضكم يقول ايه صدفه ، بس انا صارت معاي مواقف كثييييره كثيره وهذا مجرد موقف بسيط منهم ، طبعاً مو كل مواقفي مشتريات واشياء زي كذا ، التوكل يكون بكل شيء حتى بالآخره ❤

طيب لو انتو حابين تجربون هالشيء وتسمتعون فيه معاي ، روحو لأكاونت الشيخ مشاري الخراز في التويتر ( تلاقوني مسويه له فولو ) بعدين روحو للمفضله تبعه وابدو من تحت .. هو كاتب خطوات التوكل على الله من قلبك وكلام جمييييل ❤ واتذكر كنت اقرا مواقف الناس بعد ماصارو يتوكلون على الله في ابسط امور حياتهم وكنت اقول مستحيل لو بيصير لي كذا بكون اسعد شيء ، اتخيلني بس كل شيء ابيه او شايله همه يتسهل لي !! ❤_❤ والحين صرت وحده منهم الحمدلله ..

 

طيب شيء ثاني حابه اقولكم عليه قبل تروحون للمفضله تبعه ، ابيكم تتذكرون ( وعلى نياتكم ترزقون ) صفّو نيتكم وبتلاقون الراحه النفسيه والسعاده وتسهيل الأمور .. لو انتي حاسه انك حاقده على احد ، اجلسي بينك وبين نفسك وسامحي هالشخص لوجه الله مو عشان سواد عيونه ، عشان ربي ❤ عشان ترتاحين انتي وتحسين قلبك خفيف مو شايل كل شيء ..

ولو انتي حاسه انك حاسده احد غصب عنك ، تصرفي بشكل عكسي على طول ، يعني لو وحده حسيتي انك بديتي تحسدينها على شيء او تتمنين شيء معاها على طول قولي الله يهنيها فيه وتأكدي ربي بيعطيك احسن منها ، وانتبهي تغيرين تعاملك مع احد عشان هو بس احسن منك ، بالعكس عامليهم بأحسن مايكون وبالكلمه الحلوه وعلى طول بتلاقين نفسك مرتااااحه نفسياً ❤ لأن شعور الحسد ابداً مو حلو واول ماتحسون انكم بديتو تشوفون اللي مع غيركم او اللي حققه غيركم استغفرو وادعو ربي يشيل هالشيء من قلبكم ❤

ترا صفاء النيه من اهم الأشياء عشان ربي يرضى عليكم ويحقق لكم ماتتمنون ❤ ( لايؤمن احدكم حتى يحب لأخيه مايحب لنفسه )

يارب ماكون طولت بالكلام ، ودي يكون الكلام خفيف ومختصر وحاولت اختصر قد ما اقدر ❤

الله يسعدكم كلكم ولاتنسون تروحون لمفضلة الشيخ مشاري الخراز وتسوون الخطوات ونصير صديقات هههههههههههههه :$

وبرضو بتلاقوني مسويه فولو لحساب قانون الجذب والطاقه ..

 

" ترا ماقريت كلامي بعد ماكتبته فـ لو فيه اخطاء او كلمات متكرره اعذروني :$ ابي يكون عفوي ومن القلب للقلب  "

 

مع السلامه ، اشوفكم على خير

ندى ❤